Ауданымызға жұмыс сапарымен Қазақстан Республикасы Парламенті Мәжілісінің депутаты Әбдіманап Бектұрғанов келіп, бірқатар нысандарды аралап қайтты. Ең алдымен, «Батыр бабалар» мемориалына келген халық қалаулысы аудан әкімі Жандарбек Далабаевпен бірге мәдениет колледжінің студенттерімен кездесті. Жүздесу барысында Әбдіманап Елікбайұлы аудан жастарына Елбасы Нұрсұлтан Назарбаевтың бастамасымен жарияланған Жастар жылының мән-маңызы туралы кеңінен айтты. Сондай-ақ, жастардың, әсіресе, мамандық таңдауда қателеспеуі қажеттігіне назар аудартты, оларды ойландырған, толғандырған бірқатар сұрақтарына жауап берді. Бұл жерді аралап болған соң, Мәжіліс депутаты студенттермен бірге «Анаға құрмет» музейіне де кіріп шықты. Ал, мұнда аудан басшысы Жандарбек Ермекұлы ел ертеңі – жастарды жақсы істерге шақырып, өз ақыл-кеңесін берді.
Келесі кезекте Әбдіманап Елікбайұлы Қаскелең қаласындағы «Қарлығаш» шағын ауданына барып, ондағы істің барысымен танысты. Бұл ретте Мемлекет басшысының «7-20-25» бағдарламасы бойынша тұрғын үймен қамтамасыз етудің жай-күйіне мән берді. Бағдарламаның жүзеге асу барысына ден қойып, пәтерлерді аралап, жақсы бағасын берді. Сонымен қатар, тұрғын үй кешенінің жанында орналасқан «Қарлығаш» балабақшасына да барып, тәрбиешілермен білім реформасының тиімділігі жөнінде сөз қозғап, айлық жалақылары жайында сұрап білді. Және де оларды толғандырып жүрген сұрақтарына да құлақ асып, білім саласындағы бірнеше мәселені ортаға салды. Сондай-ақ, бөбекжайдың ішін де аралады.