Республика көлемінде өткен тікелей эфирдегі телекөпір барысында кәсіпорынды Алматы облысының басшысы Амандық Баталов пен өндіріс ошағының директоры Александр Вязников салтанатты түрде ашты. Телекөрсетілім барысында өндіріс орын басшысы: «Зауыт өз өнімдерімен Қазақстан мен Орта Азия, Моңғолия, Қытай, Ауғанстан, Ресей, Өзбекстан, Түркменстан, Тәжікстан елдерінің де нарығын қамтамасыз етеді. Енді алдағы кезде тауар көлемін көбейтіп, оның қатарын 80 мың тоннаға дейін жеткізу көзделуде», – деді. Өз кезегінде Елбасы Нұрсұлтан Әбішұлы Назарбаев: «Алматы облысына кеспе шығаратын өндіріс өте керек. Барлығы қай жерде болса да, ауылшаруашылығы өнімін терең өңдеу мәселесіне мемлекет ылғи қолдау көрсетіп отырады. Міне, өнеге көрсетіп отырсыздар. Баршаларыңызға рахмет!» – деп алғысын білдірді. Осылай өз жұмысын бастаған зауыттың ағымдағы қуаты 51 мың тонна немесе 400 млн-нан аса дана дайын өнім өндіреді. Биылғы жылы 3 өндірістік желісін қосқан зауытта баршамызға белгілі «Роллтон» және «BIGBON» кеспелері дайындалады.