[:kk]Мал ұрлығының алдын алу мақсатында[:]

[:kk]«Мал – баққанға бітеді» дегендей, төрт түлік малдың қадір-қасиетін білетіндерге оны өсірудің машақаты жақсы мәлім. Алайда, сол жазғы-қысқы бағымын қадағалап, азық-суын сайлап, тұратын орнын жайлап, күтіп отырған үй жануары табан астында қолды болып кетіп жататын жағдайлар да жоқ емес.

Ресми мәліметтерге сүйенсек, жыл басынан бері ауданымызда 17 мал ұрлығы тіркелген екен. Оның 11-і ашылып, оңай олжаға кенелгісі келгендер құрықталған. Ал, былтырғы жылдың дәл осы кезеңін салыстырмалы түрде алатын болсақ, 12 мал ұрлығы тіркеліп, оның тең жартысы ашылған.

Құқық қорғау саласы қызметкерлерінің айтуынша, төрт түлік негізінен өрісте, жайылымда жүргенде қолды болады екен. Сонымен қатар, шаруалардың қожалығындағы қораларының есіктерін дұрыстап құлыптамай, түнгі мезгілдерде қараусыз қалдырулары да асырап, баққан төлдерінің біреудің жетегінде кетуіне негізгі себеп болып жататын көрінеді. Ал, мал ұрлығын ізін суытпай ашуға, кей жағдайларда, иелерінің бірнеше күн көлемінде өздері іздестіріп, уақыт өткізіп барып полиция қызметкерлеріне хабарлауы да кедергі келтірсе керек.

Осы жылдың ақпан айында аудан әкімі Махаббат Бигелдиевтің №21-ө н/қ өкімі негізінде, құрамына прокуратура, ІІБ, Мемлекеттік кірістер басқармасы қызметкерлері, жұмыспен қамту орталығы, ветеринария, ауыл шаруашылығы, статистика, жер қатынастары, кәсіпкерлік бөлімі мамандары, округ әкімдері кірген арнайы жұмыс тобы құрылған. Ондағы мақсат – осы төрт түлікті жасырын жетектеп кету жағдайларының алдын алу, ішкі сауда нысандарына сырттан сатылуға келген жануарлардың құжаттарын тексеру еді.

Жақында, Алматы облысы прокуратурасының «2016-2017 жылдарға арналған  мал ұрлығына қарсы жол картасын» жүзеге асыру мақсатында, аудан әкімінің орынбасары Мақсұт Джапаров жетекшілік ететін осы аталған жұмыс тобы рейд ұйымдастырды. Оның барысында ауданымызға қарасты  Жаңашамалған, Әйтей, Елтай ауылдық округтерінде базарларға сатуға  әкелінген үй жануарларын тасымалдау тәртібі және ілеспе  құжаттарының болуы қадағаланды.

Мал базарларына апаратын жолдарда сағаттап тұрып, арлы-берлі өткен көліктерді қараған тексерушілер бірнеше жүк көлігін тоқтатты.  Алайда, № КZ 799  МКА /16 автокөлігі комиссия назарына ерекше ілікті. Анықталғандай, Шығыс Қазақстан облысы Абай  ауданы, Құндыз ауылының тұрғыны С.Құдайбергенов 17  ірі қараны Жамбыл  ауданындағы  мал  базарына   сатуға  алып  бара жатқан екен. Тексеріс барысында осы малдардың АШЖБ веб-порталында тіркелгендігі және осы малдардың  ветеринариялық  анықтамаға  сәйкес   құлақ жапсырмаларының бар екендігі   белгілі болды. Алайда, иесіне  ветеринариялық  анықтамасының мерзімі өтіп кетуіне байланысты, малдарын өзі тұрақтауға келген Елтай  ауылдық  округіне, ауыл шаруашылығы жануарларын бірдейлендіру веб-порталына  уақытша  тіркеу керек екендігі түсіндіріліп, ескерту  жасалды.

Жалпы, бұл аталған жұмыс тобының құрылғаннан бергі өткізіп отырған үшінші ауқымды тексеру жұмысы екен. Таяуда, аудан әкімінің орынбасары М. Джапаров топтық рейдтерден бөлек, комиссия құрамындағы барлық мекемелерге ортақ іске қатысты, құзіреттеріне кіретін бірқатар тапсырмаларды да жүктегенін де айта кеткен жөн.

Алдағы уақытта  аудан көлемінде  қалған ауылдық  округтерде де осы мәселеге қатысты нақты іс-шаралар  жүргізу жоспарлануда.

Клара КӨПБАЕВА.[:]