[:kk]Жаңа сайланған округ әкімдері таныстырылды[:]

[:kk]Жақында аудан әкімі Махаббат Бигелдиев Қаскелең қаласы, Әйтей, Елтай, Райымбек және Үшқоңыр ауылдық округі тұрғындарына үстіміздегі жылғы тоғызыншы тамызда өткен сайлауда жеңіске  жеткен әкімдерді таныстырды. Олардың сайлануы округ әкімдерінің төртжылдық өкілеттігінің мерзімі бітуіне байланысты еді. Сайлауда жоғарыда аталған округ әкімінің әрқайсысының орнына үш адамнан кандидатуралар  ұсынылған.

Қорытындысында, аудандық мәслихат депутаттарының басым көпшілігінің дауысымен, Әділбек Далабаев Қаскелең қаласының мэрі,  ал, Үшқоңыр ауылдық округінің әкімі Бексұлтан Ақылбек болды. Сол сияқты Әйтей, Елтай және Райымбек ауылдық округтерінің әкімі болып тиісінше Қайсар Қиқымов, Бақытгүл Жұманбаева, Айдын Әуесбай сайланды. Соңғы үш әкім бұл  лауазымға екінші мерзімге сайланды.

Сайланған қала және ауылдық округ әкімдерін таныстыра келе Махаббат Садуақасұлы олардың әрқайсысының бойындағы кәсіби шеберлікті, кез келген мәселені шеше алатын қабілетін, белгіленген міндетті жоспарлы түрде жүзеге асыра алатын қасиетін атап өтті.

Аудан басшысымен округ активі – ақсақалдар, жұртшылық пен интеллигенция өкілдері де келісті. Халық қалаулыларының сайлауын қолдаған округ тұрғындары әкімдерге табыс тіледі және олардың халыққа жақын болуына үлкен үміт артты.

Айта кету керек, Қаскелең қаласындағы кездесуде жиналғандар бұрынғы мэрі – Біржан Нұрлыбаевты жасқы тілекпен құрметтеп шығарып салды.[:]