Үшқоңыр жайлауының тазалығы, инфрақұрылымы зерделенді

Қазақстан Республикасы Мәдениет және ақпарат министрлігінің бастамасымен «Таза Қазақстан» жалпыұлттық акциясы аясында елімізде «Қоғамдық эко-бақылау» республикалық акциясы өз жұмысын бастаған болатын. Аталмыш шара 5 маусым – Дүниежүзілік қоршаған ортаны қорғау күні мен Экологтар күніне орай ұйымдастырылуда. Оның негізгі мақсаты – экологиялық мәдениетті арттыру мен қоршаған ортаны қорғауға қоғам назарын аударту. Сондай-ақ бұл акция ағымдағы жылдың 5 маусымы мен 5 шілдесі аралығын қамтиды және ол үш кезеңнен тұратын онкүндікке бөлінген. Атап айтқанда, 5-15 маусым аралығында туристік және тарихи-мәдени объектілерге мониторинг жүргізіледі, 16-25 маусымда абаттандыру, стихиялық қоқыс тастайтын орындар, жасыл желектерді күтіп-баптау мәселелері бақылауға алынады және 26 маусым мен 5 шілде арасында жер қойнауын пайдалану саласына мониторинг жүргізу жоспарланған.

«Қоғамдық эко-бақылау» акциясына Қарасай ауданындағы қоғамдық кеңесінің мүшелері де белсенділік танытуда. Мәселен, 11 маусым күні аудан аумағындағы табиғаты көркем, туризмге сұранып тұрған Үшқоңыр жайлауына арнайы экологиялық мониторинг ұйымдастырылды. Бұл жұмысқа қоғамдық кеңестің әлеуметтік саланы дамыту, еңбекпен қамту, білім, денсаулық сақтау, мәдениет және жастар саясаты мәселелері бойынша комиссиясының төрайымы Ұлтусын Бархинова жетекшілік етті. Ал комиссия құрамында қоғамдық кеңес мүшелері – Сапар Жұмабаев, Серікжан Нұрпейісов, Әлия Даниярова және Айжан Балажанова болды.

Тексеру барысында Үшқоңыр тауының тазалық жағдайы, табиғи ландшафтының сақталуы мен инфрақұрылым мәселелері зерделенді. Мониторинг қорытындысы бойынша ұсыныстар дайындалып, тиісті мекемелерге жолданатын болды.

«Қоғамдық эко-бақылау» акциясы аясындағы бұл бастама табиғатты аялауға бағытталған қоғам белсенділігінің артуына, сондай-ақ экологиялық мәдениетті қалыптастыруға үлкен үлес қосатыны сөзсіз.

 Қарасай ауданының ішкі саясат бөлімі.