SDU University 2026 жылдың 1 наурызында республика көлемінде талапкерлерге арналған SDU Proficiency Test (SPT) олимпиадасын өткізетінін хабарлайды.
SDU Proficiency Test (SPT) – мектеп пен колледж түлектеріне арналған республикалық деңгейдегі олимпиада. SDU University бұл білім сайысын 12 жылдан бері тұрақты түрде өткізіп, еліміздің түкпір-түкпіріндегі дарынды, алғыр әрі білімге құштар жастарды қолдап келеді. Осы уақыт аралығында мыңдаған талапкер өз білімін дәлелдеп, гранттар мен оқу ақысына жеңілдіктерге ие болды.
Олимпиаданың негізгі мақсаты – талапкерлерге болашақ мамандығын саналы түрде таңдауға көмектесу, сондай-ақ түрлі деңгейдегі гранттар мен оқу ақысына жеңілдіктер ұсыну арқылы сапалы жоғары білімге қолжетімділікті арттыру.
Аталған олимпиада Қазақстан Республикасы Білім және ғылым министрінің 2018 жылғы 12 қазандағы №514 бұйрығымен бекітілген «Жалпы білім беретін пәндер бойынша республикалық және халықаралық олимпиадалар мен ғылыми жобалар тізбесіне» енгізілген SDU Proficiency Test (SPT) ретінде өткізіледі.
Олимпиада кезеңдері
SPT олимпиадасы 2 кезеңнен тұрады:
I кезең
Қатысушылар арнайы портал арқылы онлайн форматта логикалық ойлауға арналған 50 сұрақтан тұратын тест тапсырады.
II кезең
Екінші кезеңге өткен талапкерлердің тізімі SDU University-дің ресми sdu.edu.kz сайтында жарияланады. Қатысушылар еліміздің 17 ірі қаласында орналасқан белгіленген тестілеу орталықтарында офлайн форматта таңдау пәндері бойынша тест тапсырады.
Тест 11-сынып бағдарламасы негізінде, қазақ немесе орыс тілінде өткізіледі. Әр талапкер 3 пән бойынша 100 сұраққа жауап береді.
Марапаттау
Нәтижесінде 306 үздік қатысушы SDU University-де 4 жылға жарамды гранттармен және оқу ақысына жеңілдік сертификаттарымен марапатталады.
Олимпиада тегін өткізіледі.
SDU University-дің баспасөз қызметі.