Тұмау мен суық тиюдің белгілеріне ұқсас сырқаттардың бірі – жедел респираторлы вирусты инфекция (ЖРВИ). Бұл дерт ауа тамшылары арқылы вирустық аурулардың кең таралған тобына жатады. Сондықтан одан барынша сақтанған жөн. Соңғы уақытта дәл осы ЖРВИ-дің Қарасай ауданында таралуы көңіл қуантарлықтай емес. Оның маусымдық ахуалы ушыға бастады.
Аудандық санитариялық-эпиде-миологиялық бақылау басқармасының соңғы апталық есебіндегі дерегіне сүйенсек, ауданда клиникалық белгілері бар ЖРВИ бойынша 6836 жағдай тіркелген. Оның ішінде 2657-і 14 жасқа дейінгі балаларда анықталған. Бұл көрсеткіш науқастанушылардың маңызды бөлігін құрап, балалар арасында аурушаңдықтың жоғары қарқынмен таралып жатқанын көрсетеді.
Педиатрлардың сөзінше, бұл топта иммундық жүйе әлі толық қалыптаспайтындықтан, вирустық инфекциялар тез таралады. Сол үшін қазіргі уақытта балабақшалар мен мектептерде санитарлық талаптардың сақталуын күшейту, ауаны жиі тазарту, балалардың жеке гигиенасын қадағалау жұмыстары жалғасып жатыр.
Одан бөлек Қарасай ауданының медициналық ұйымдары тұрғындардың жедел жүгінуіне арналған қосымша қабылдау уақыттарын енгізіп, емханаларда кезектілік деңгейін бақылауда ұстап отыр. Санитариялық қызмет мамандары аурушаңдықты төмендету үшін түсіндіру жұмыстарын жалғастырып, білім беру мекемелерінде профилактикалық тексерулер өткізуде. Аудандық санитариялық-эпидемиологиялық бақылау басқармасының өкілдерінің сөзінше, маман кеңесін орындау арқылы ауруды жұқтыру ықтималдығын айтарлықтай төмендетуге болады
ЖРВИ-дің таралуына тоқталар болсақ, оған әсер ететін факторлар аз емес. Бұл ретте сарапшылардың пайымдауын сөз етуге болады. Олардың айтуынша, күз-қыс маусымында ауа райының құбылмалы болуы, адамдардың көбіне жабық орындарда жүруі және балалардың мектеп пен балабақша сияқты ұжымдық ортада жиі қатынаста болуы аталған дерттің жұқтыру қаупін арттырады. Сонымен қатар иммунитеттің әлсіреуі де ауруға деген бейімділікті күшейте түседі. Сондықтан дәрігерлер қауымы ЖРВИ-дің алғашқы белгілеріне бей-жай қарамауын ескертеді. Бұл дертке шалдыққанда көбінесе әлсіздік, дене қызуының көтерілуі, жөтелдің пайда болуы, тамақтың жыбырлап, ауырсынуы, мұрынның бітелуі байқалады. Медицина мамандары егер осындай аурудың алғашқы белгілері болған кезде емханаға жүгінуге кеңес береді. Әсіресе, балалар мен қарияларда асқынулар жиі кездесетін болғандықтан, дер кезінде тексерілу маңызды.
Сонымен қатар дәрігерлер антибиотиктерді өз бетінше қабылдауға болмайтынын айтуда. Өйткені мұндай емдеу жолы вирустық инфекцияға әсер етпейді. ЖРВИ-ден емделу үшін демалыс қажет және сұйықтықты көп ішіп, дәрігелерлер кеңесімен ғана дәрілер қабалдау керек.
Дидар МӘЛІКҰЛЫ
