Шілде айының 7-9 күндері Испания елінің астанасы Мадрид қаласында грек-рим күресінен жастар арасында халықаралық турнир өткен болатын. Дүниежүзілік додаға 15 мемлекеттен 125 спортшы қатысып, боз кілемде өздерінің шеберліктерін танытты. Бұл әлемдік жарысқа Қазақстанның абыройын қорғау үшін жерлестеріміз де сынға түсті. Нәтижесінде күрес спортын серік еткен жастар байрақты бәсекеден командалық есеп бойынша ІІ орынмен оралды. Мұндай жетістікке жетуімізге төрт алтын, екі күміс және үш қола медальдың иесі атанған спортшыларымыз себепші болды. Олардың қатарында үздік нәтиже көрсетіп, алтын медаль алған Балқаш ауданының мақтанышы Бекарыс Мейрамбек те бар екенін айта кеткен жөн.
Ауданның ғана емес, елдің атын әйгілі еткен спортшы – Ақдала ауылының тумасы. Алматы қаласындағы республикалық спорт колледжінің студенті, Қазақстанның спорт шеберіне үміткер, республикалық ұлттық құрама командасының мүшесі болып табылады.
Бекарыс жоғарыда аталған әлемдік додада 55 кг салмақ дәрежесі бойынша бағын сынап, қарсыластарын айқын басымдықпен жеңді. Осылайша үздіктердің үздігі атанды.
Жерлесіміздің ақтық бәсекедегі қарсыласы Испания мемлекетінің 11 мәрте чемпионы атанған белгілі балуан болғанын айта кету керек. Десе де, Бекарыс онымен белдесуде айласын асыра білді. Анығын айтқанда, 6:9 есебі бойынша жарыстың жеңімпазы атанды.
Елдің абыройын өзге елде асқақ еткен Бекарыс Мейрамбек жайлы айтар болсақ, ол Ақдала орта мектебінің түлегі. Бала кезінен спортты жаныны серік еткен. Оның алғашқы жеңісті жолы аудандық балалар мен жасөспірімдер спорт мектебінде шынығып жүргенде басталған екен. Күреске деген ынтасы мен шеберлігінің арқасында облыстық, республикалық чемпионаттарда жеңімпаз атанған. Тәлімгерлерінің үміттерін ақтап, республикалық спорт колледжіне арнайы жолдама арқылы мемлекеттік грант иегері атаныпты.
Бала балуанның болашағынан үміт күткен алғашқы жаттықтырушылары аудандық балалар мен жасөспірімдер спорт мектебінің директоры Хамит Сембаев пен Грек-рим күресінің жаттықтырушысы Назтай Мейрамбек, сондай-ақ Боранбек Қоңыратов пен Дидар Керімбаев сынды оның қазіргі жаттықтырушылары оның алдағы жарыстарына зор сеніммен қарайды. Бекарастың осындай тәжірибелі тәлімгерлерінің еңбектері еленіп, келешекте Әлем, Олимпиада чемпионы болады деп ойлаймыз.
Балқаш ауданының даңқын ғана емес, елдің атын әлемге мәшһүр еткен Бекарыстың алдағы бәсекелеріне сәттілік тілейміз! Дүбірлі додаларда оза шауып, жеңіс тұғырынан түспесін.
Д. МУХАМАДИЕВ.
Балқаш ауданы.