Қарасай ауданының аумағында Президенттің «Таза Қазақстан» акциясын қолдау мен оны өскелең ұрпаққа дәріптеу ісі ілгеріліп, түрлі экошаралар әр апта сайын өткізілуде. Дәстүрге айналған сенбіліктерден бөлек, жасыл желекпен жайқалту жұмысы да ұмыт қалған емес. Өткен аптада осындай өнегелі шараның бірі ұйымдастырылып, Елтай ауылындағы жайлы мектептің айналасына ағаштар егілді.
Мұндай игі бастамаға аталмыш округтің аумағында жұмысын ілгерілетіп отырған Оңтүстік Кореяның «KT&G» халықаралық компаниясы демеушілік жасаса, Қарасай ауданының әкімдігі өнегелі істі қолдап, мектеп аумағында экологиялық шараның өтуіне ұйытқы болды.
Салтанатты басқосуда алдымен Қарасай ауданы әкімінің орынбасары Бексұлтан Ақылбек сөз сөйлеп, «Таза Қазақстан» акциясының маңызын айтып, аудан көлемінде атқарылып жатқан жұмыстарға тоқталды. Одан бөлек осы шараға демеушілік жасап, экоакцияға бастамашыл болған «KT&G» халықаралық компаниясының ұжымына алғысын жеткізді. Осы ретте аталған өндірістік орынның бас директоры және завод жетекшісі Юн Дэ Бинге ізгі ілтипат танытып, қазақтың салты бойынша иығына шапан жапты.
Мұндай құрметке ие болған компания басшысы Юн Дэ Бин жұртшылық алдында қарасайлықтарға ризашылығын білдіріп, өндіріс орнының Қазақстан жерінде табысты қызмет етіп жатқанын сөз етті. Сондай-ақ аталған шара «Green Globe Project Kazakhstan» бастамасымен жүзеге асып, оның қоршаған ортаны аялауға үлесі зор екенін жеткізді.
– Компаниямыз Қазақстанда өз қызметін табысты жүргізіп қана қоймай, жергілікті қоғамдастықпен бірге өсіп-өркендеп келеді. Бұл өлке – біздің қызметкеріміз еңбек етіп, өмір сүріп жатқан орта ғана емес, сонымен қатар сенімді серіктестіктермен өзара ынтымақтастық орнатып, ортақ жетістіктерге қол жеткізіп отырған қастерлі мекеніміз. Сондықтан біз бизнестің міндеті тек экономикалық нәтижелерге қол жеткізумен шектелмейді деп есептейміз. Кәсіпорын қоршаған ортаны қорғауға, қоғамның тұрақты дамуына және өңірдің әл-ауқатын арттыруға өз үлесін қосуы тиіс, – деді компания директоры.
Ал «Таза Қазақстан» акциясының өңірдегі ахуалы жайында Алматы облысының тұрғын үй-коммуналдық шаруашылық және абаттандыру басқармасының өкілі Алина Түсіпбаева түсіндіріп, облыс көлемінде экошаралардың легі әлі де жалғасатынын айтты.
Салтанатты шарадан кейін жоспарға сәйкес жиналған жұртшылық жайлы мектептің қасындағы белгіленген орынға 200 түп ағаш отырғызды. Оның ішінде алма, алмұрт, шие, қара өрік тұқымдары болды. Әрбірі 50-ден егілді. Жасыл желекті көгалдандыруға «KT&G» халықаралық компаниясының ұжымы, Елтай ауылдық округі әкімдігінің қызметшілері, аудан жастары және еріктілер атсалысты.
Дидар МӘЛІКҰЛЫ.