Елді алаңдатқан өзекті мәселелер назарға алынды

Бүгін Мемлекет басшысы Қасым-Жомарт Тоқаевтың қатысуымен Ұлттық құрылтайдың кезекті отырысы өтті. Аталған жиында бірқатар маңызды мәселе қаралды. Әсіресе соңғы бірнеше айда кәсіпкерлер мен қарапайым халықты мазалаған салық реформасына аса мән берілді.

Президенттің айтуынша, қазіргі таңда елімізде екі миллионнан астам салық төлеуші, яғни жеке кәсіпкерлер мен заңды тұлғалар тіркелген. Алайда олардың қандай кәсіпорындар екеніне, қалай пайда болғанына, қанша салық төлейтініне, тіпті оны төлеп жатыр ма, жоқ па дегенге еш талдау жасалмаған. Осыған байланысты салық реформасы бойынша батыл шаралар қабылдау қажет. Әрине, Мемлекет басшысының айтқан бұл сөздеріне біз де толық қосыламыз. Десе де алдағы уақытта орын алатын өзгерістер кәсіпкерлердің мүмкіншілігін ескере отырып жасалса дейміз. Себебі еліміздегі шағын және орта бизнестің күйі оның нақты мүмкіндіктерінен алыс. Бұл бизнестің тоқырауына және төмен бәсекелік қабілеттілікке әкелуі әбден мүмкін. Сондықтан салық жүйесінде қандай өзгерістер енгізілсе де бірінші кезекте халықтың жағдайы қарастырылады деп үміттенемін.

Ұлттық құрылтайда көтерілген тағы бір маңызды мәселе – бірыңғай уақыт белдеуі. Бұған байланысты Қасым-Жомарт Кемелұлы арнайы зерттеулер жүргізіліп, шешімге күмән келтірген қоғам белсенділерінің қаупі мен күмән-күдігі расталмағандықтан мәселені шиленістірмей, саясиландырмай, пікірталасты тоқтату қажет екенін жеткізді. Оның үстіне бірыңғай уақыт белдеуі мемлекетті басқару ісін жеңілдетіп, логистика мен көптеген бизнес-үдерісті оңтайландыруға септігін тигізетіндігін атап өтті. Яғни алдағы уақыттада елімізге енгізілген толықтай біріңғай уақыт белдеуі өзгеріссіз қалады.

Жалпы бүгінгі IV Ұлттық құрылтай барысында біраз өзекті мәселелер көтеріліп, түрлі пікірлер айтылды. Жеке басым осында қабылданған шешімдер Қазақстандағы қазіргі жағдайды жақсы жаққа өзгертуге көмектеседі деп сенемін.

Атлана Исаева,

«Atlant Media» ЖШС-нің директоры, Қарасай аудандық «Naqty» газетінің бас редакторы, аудандық мәслихат депутаты.