Президенттің биылғы Жолдауын ерекше ықыласпен тыңдадым. Әсіресе, ауыл шаруашылығын дамытуға және жастардың болашағына арналған бағдарламалар ерекше әсер қалдырды. Ауылдың дамуы тек ауыл тұрғындары үшін емес, бүкіл ел үшін маңызды. Себебі ауыл — біздің тамырымыз, ұлттық болмысымыздың бастауы. Президенттің ауыл шаруашылығы саласына инвестицияны көбейту туралы айтқаны өте дұрыс шешім. Егер ауылдағы жастарға білім мен жұмыс беру мәселелері шешілсе, біз болашақта үлкен жетістіктерге жетеміз.
Сонымен қатар, әлеуметтік қолдау мәселелері де назардан тыс қалмады. Әсіресе зейнеткерлер мен әлеуметтік осал топтарға көмек көрсету туралы бастамалар көңіл қуантады. Бірақ бұл айтылғандардың қағаз жүзінде қалмай, шынайы жүзеге асуы маңызды. Біз, үлкендер, елдің болашағына сенеміз, сондықтан жастар осы мүмкіндікті дұрыс пайдалануы керек.
Серік Расмухамедов,
Қарасай аудандық ақсақалдар кеңесі төрағасының орынбасары.
