Жол картасы аясында атқарылып жатқан жұмыстар талқыланды

Жуырда аудандық әкімдіктің үлкен мәжіліс залында «AMANAT» партиясы Алматы облыстық филиалы жанындағы партиялық бақылау комиссиясының сыбайлас жемқорлыққа қарсы іс-қимыл жөніндегі кеңеспен бірлескен көшпелі отырысы өтті. Партияның «Халықпен бірге!» атты сайлауалды бағдарламасының бекітілген Жол картасы аясында және де сыбайлас жемқорлыққа қарсы атқарылып жатқан жұмыстар талқыланған жиынға «AMANAT» партиясының Алматы облыстық филиалы төрағасының орынбасары Аслан Кубентаев, облыстық филиал жанындағы партиялық бақылау комиссиясының төрағасы, облыстық мәслихат депутаты Амангелді Сембаев, облыстық филиал жанындағы Сыбайлас жемқорлыққа қарсы іс-қимыл жөніндегі кеңес төрағасы, облыстық мәслихат депутаты Рустем Өтембаев, «AMANAT» партиясы Қарасай аудандық партиялық бақылау комиссиясының мүшесі Қаныбек Айтжанов, комиссия және кеңес мүшелері, облыстық және аудандық мәслихат депутаттары, ауылдық округ әкімдері, бастауыш партия ұйымдарының төрағалары қатысты.

Амангелді Тілеубердіұлы мен Рүстем Тұрсынбайұлы ашып, жүргізген басқосуда «AMANAT» партиясының сайлауалды бағдарламасын іске асыру шеңберінде әзірленген өңірілік Жол картасы аясында атқарылған және де атқарылуы керек жұмыстармен аудандағы сыбайлас жемқорлыққа қарсы іс-қимыл шараларының ұйымдастырылуы туралы мәселелер қаралды. Бұл жөнінде аудан әкімінің орынбасары Рустам Атшабаров баяндады.
Аудан басшысы орынбасарының айтуынша, партияның Алматы облысы бойынша 2023-2027 жылдарға арналған «Халықпен бірге!» атты сайлауалды бағдарламасының бекітілген Жол картасы негізінде Қарасай ауданы бойынша 2025 жылға 64 іс-шараның шешілуі көзделген. Оның 6 пункті толықтай орындалды, 52-сі орындалу үстінде. Сондай-ақ 5 пункт белгілі себептерге байланысты ағымдағы жылы орындалмайды, 1 пункт қате енгізілген. Барлық белгіленген жұмыс жоспарға сәйкес жүргізіліп жатыр. Алайда кейбір мәселенің уақытылы шешімін табуы үшін партиялық бақылау комиссиясы мүшелерінің қолдауы қажет.
Атап айтқанда, Жол картасының 38-пунктінде көрсетілгендей Қырғауылды және Жандосов ауылдарында «Жайлы мектеп» ұлттық жобасы аясында жоспарланған мектеп құрылыстары «Samruk-Kazyna Construction» АҚ тарапынан қаражат жетіспеуіне байланысты жүзеге асырылмай тұр. Бұған байланысты аудандық әкімдік тарапынан Қырғауылды ауылында салынбай қалған 3 га жер теліміне жаңа мектеп салу мақсатында, қазіргі уақытта «Менің Мектебім» ЖШС-мен келіссөздер жүргізілуде. Аталған мәселе тезірек шешілу үшін оны өңірлік үйлестіру кеңесіне шығарып, жеке мектеп салуға қолдау көрсету керек.
40-пунктте көрсетілген мәселелер бойынша Шамалған ауылындағы көп салалы және су шаруашылығы колледжіне күрделі жөндеу жұмыстарына қаржы бөлу Алматы облысының білім басқармасының құзіретінде. Үшқоңыр су шаруашылық колледжі бойынша 2022 жылдың 29 шілде айында күрделі жөндеу жұмыстарына ЖСҚ құжаттары әзірленген, жоба құны 379,1 млн.теңгені құрайды. Ал Шамалған ауылындағы көп салалы колледжіне күрделі жөндеу жұмыстарына ЖСҚ әзірленуіне 13 млн қаражатты қажет етеді. Қазіргі уақытта жұмысты тежеп тұрған тек қаражат мәселесі ғана. Бұған қоса аталған пунктте Алматы облыстық білім басқармасының теңгеріміндегі Алматы қаласы Медеу ауданы, Бөгенбай батыр көшесі, 53 мекенжайында орналасқан И.Нүсіпбаев атындағы интернаттың күрделі жөндеу жұмыстарына қатысты мәселе Қарасай ауданына ешқандай қатысы жоқ, сол себептен бұл мәселені қайта қарап, тиісті басқармаға тапсырма беру қажет.

Бүгінгі таңда Қарасай ауданына 15 жаңа медициналық мекеме салып, 3 мекемеге күрделі жөндеу жұмыстарын жүргізу қажет. Қазіргі сәтте ауданға қарасты Қайнар, Бекболат, Шалқар және Ұлан ауылдарында 50 келушіге арналған дәрігерлік амбулаториялардың жобалық-сметалық құжаттамалары дайындалған. Осыған байланысты партиялық бақылау комиссиясының мүшелері аталған жобалардың құрылысына бюджетті қарастыру барысында қаржы бөлінуіне қолдау көрсету керек.
Жобаның 78-пунктіне сәйкес, 2024 жылы ауданның жолдарын жөндеуге 2,9 млрд.теңге қарастырылып, 28 елді мекеннңің 60 көшесінің 71 шақырымына жөндеу жұмыстары жүргізілді. Ал 2025 жылы 21 елді мекендегі 91 көшенің 71 шақырымын жөндеуге 2,7 млрд.теңге бөлінген. Алайда аудандағы халық саны жыл сайын артып жатқанына байланысты әлеуметтік қажеттілігі бар нысандар саны да артқан. Соған сәйкес жаңа жолдар салу қажеттілігі артып отыр. Осы ретте партиялық бақылау комиссия мүшелері жағдайды ескере отырып, облыс бюджетін нақтылау барысында Қарасай ауданының жол жөндеу жұмыстарының көлемін арттыруға қаржы бөлінуіне ықпал етуі қажет.
98, 99 пункттер бойынша ауданға қарасты Жібек жолы ауылына 2 өрт сөндіру автокөлікке арналған өрт сөндіру бекетін салу мақсатында құрылыс-монтаж жұмыстары басталды. Мердігер мекеме – «Мир-А Констракшн» ЖШС, жоба құны – 879 млн.теңге. Құрылыс жұмыстары 2026 жылдың 4 қаңтарына дейін аяқталады деп жоспарланған. Ал Қаскелең қаласында орналасқан №5 өрт сөндіру бөлімінің ғимаратына күрделі жөндеу жұмыстарын жүргізу мақсатында 2025 жылы жобалау-сметалық құжаттаманы әзірлеуге қаражат қарастырылмады. Қажетті қаражат сомасы – 22,6 млн.теңге.
Аудан әкімінің орынбасары Рустам Әмірғалиұлы осы және де өзге жол картасында көрсетілген мәселелерді жиынға қатысып отырғандарды жағдайды назарға алып, мәселенің уақытылы шешілуіне көмектерін көрсетуді сұрады. Бірінші баяндама бойынша бірқатар депутаттар тарапынан сұрақтар қойылып, жауаптар алынды.
Мұнан соң Рустам Атшабаров күн тәртібіндегі екінші мәселе бойынша да есеп беріп, Қарасай ауданында сыбайлас жемқорлыққа қарсы іс-қимыл шаралар жоспарға сәйкес жүргізіліп жатқанын айтты.
Ауданда ҚР Сыбайлас жемқорлыққа қарсы саясатының 2022-2026 жылдарға арналған Тұжырымдамасы незінде жүйелі жұмыстары жүргізілуде. Өткен жылы оның аясында 235 іс-шара өткізілген. Ал ағымдағы жылы сыбайлас-жемқорлыққа қарсы мәдениетті қалыптастыру бойынша әлеуметтік жобаларды іске асыруға бюджеттен 3,8 млн.теңге қарастырылды.
ҚР Бас прокуратурасының құқықтық статистика және арнайы есепке алу жөніндегі Алматы облысы бойынша департаментінің ақпаратына сәйкес, 2023 жылы Қарасай ауданында сыбайлас-жемқорлыққа қатысты 20 (10 пара алу, 8 пара беру, 2 парақорлыққа делдал болу) қылмыс тіркелсе, бұл көрсеткіш 2024 жылы 100%-ға азайған. Жалпы баяндама айтылған жұмыстар өз нәтижесін көрсеткендіктен жиналғандар тарапынан сұрақтар қойылмады.
Екі баяндама талқыланып болған соң, Алматы облыстық филиал жанындағы Сыбайлас жемқорлыққа қарсы іс-қимыл жөніндегі кеңес төрағасы, облыстық мәслихат депутаты Рустем Өтембаев сөз алып, аудан көлемінде «AMANAT» партиясының Алматы облысы бойынша сайлауалды бағдарламасының орындалуына бақылауды күшейту, сондай-ақ сыбайлас жемқорлыққа қарсы іс-қимыл шараларының жүзеге асырылуына әкімдік тарапынан жауапкершілікті күшейту қажет екенін жеткізді.
Көшпелі отырыстың қорытындысы бойынша талқылауда көтерілген пікірлерді ескере отырып, Алматы облыстық филиалы жанындағы партиялық бақылау комиссиясы мен облыстық филиал жанындағы сыбайлас жемқорлыққа қарсы іс-қимыл жөніндегі кеңесінің мүшелері жаңа Қаулы қабылдады.
Жиын соңында «AMANAT» партиясының Алматы облыстық филиалы төрағасының орынбасары Аслан Нұрахметұлы аудан әкімі орынбасары Рустам Әмірғалиұлының баяндамасына оң бағасын беріп, Қарасай жері өзге аудандарға қарағанда белгіленген жұмыстарды жақсы деңгейде орындап жатқанын мәлімдеді. Сондай-ақ жоғарыда аталған мәселелер назарға алынып, алдағы уақытта қолдау көрсетілетіндігін жеткізді.

Ақтоты МЫРЗАБЕКҚЫЗЫ.