Жібек жолы ауылында Мәдениет үйі салынуда

Жібек жолы ауылдық округі соңғы уақытта жақсы жағынан өзгеріп, тұрғындардың талап-тілектері ескерілуде. Мәселен, бірқатар көшелері жөнделіп, әлеуметтік нысандар бой көтеруде. Солардың арасында жергілікті халық талай жыл күткен Мәдениет үйін атап өтуге болады. Назардағы нысанның іргетасы жақында қаланып, қазіргі уақытта құрылысы жүруде.

200 адамға арналған ғимарат Жібек жолы ауылының Байқоңыр көшесінің бойында орналасқан. Мемлекеттік мекеменің құрылысына жауапты компания – «СЕМ-Шоғы Құрылыс–Сервич» ЖШС.
Аталмыш мердігер мекеме директорының орынбасары Мерей Нұрланұлының сөзіне сүйенсек, Мәдениет үйінің құрылыс барысы ойдағыдай жүзеге асуда. Ал мекемені толықтай келесі жылы аяқтап, ел игілігіне беру жоспарда бар.
– Жібек жолы ауылындағы Мәдениет үйі бір қабатты болады. Ғимараттың жалпы ауданы 798 шаршы метр болса, пайдалануға берілетін аумағы 627 шаршы метрді құрайды. Қазіргі уақытта нөлдік бетондық жұмысы аяқталды. Бірінші қабатын көтеруге кірісеміз. Сондай-ақ сыртқы электр желісі жүргізілді. Нысанды келесі жылдың ақпан айында қолданысқа беру жоспарда бар, – деді құрылысқа жауапты мердігер мекеменің өкілі Мерей Нұрланұлы.
Айта кетейік, Жібек жолы ауылында салынып жатқан Мәдениет үйі 0,5 га жер телімінде орналасқан. Сыртқы және ішкі көрінісі заман талабына сай жасалады. Мұнда үйірмелерге арналған кабинеттер болады. Оның сыйымдылығы 16 балаға деп есептелген. Айналасы абаттандырылып, қызметкерлерге және қонақтарға көлік тұрағы қарастырылған.

Дидар МӘЛІКҰЛЫ