[:kk]Жат ағымнан сақтандыру мақсатында[:]

[:kk]Осы аптада Үшқоңыр мәдениет үйінде «Радикалданудың нәтижесі экстремизм» атты облыстық семинар өтті. Қазақстан Республикасының діни экстремизм мен терроризмге қарсы іс-қимыл жөніндегі жоспарды орындау және мектеп оқушылары, мұғалімдер, аудан тұрғындарын жат ағымдардан сақтандыру мақсатында ұйымдастырылған жиынды аудандық ішкі саясат бөлімінің басшысы Әмина Абдраманова жүргізіп отырды.

Семинар барысында қатысушыларға арнап баяндама оқылды. Мысалы, Үшқоңыр медресе-колледжінің директоры Абзал Майлыбайұлы «Адасқанның айыбы жоқ, қайта үйірін тапқан соң…» -дей келе, жат ағым жетегіне кеткенін түсініп, қайта дұрыс жолға түскендерді қатарға тартуды, ең алдымен, білім беру мекемелерінде тәртіпті күшейтуді назарға алуды ұсынды. Себебі, «тәртіпсіз берілген білім, адамзаттың қас жауы». Ал, Қарасай ауданының бас имамы Ернар Қалмаханұлы қазақ халқының әлімсақтан мұсылман екендігіне тоқталып, терроризм мен дәстүрлі дінімізді, яғни, ислам дінін қатар қоймау керектігін айтты. Өйткені, «Шынайы мұсылман – өзгеге тілімен де қолымен де зиян тигізбеген адам» (хадис). Өз кезегінде әл-Фараби атындағы ҚазҰУ доценті Ықтияр Молдатөреұлы Елбасымыздың кемел саясатын еске салды. Неге десеңіз, Сирия мәселесі бойынша әлемдік алпауыттардың басын қосар диалог немесе бейбітшілік алаңына айналған еліміз бірқатар елге үлгі. Сонымен қатар, ол сонау XII ғасырдан қалған Құран парағының суретін көпшілікке көрсетті. Бұл дегеніміз ата-бабаларымыз ертеден Құран нұрымен сусындап, Пайғамбарымыздың салып кеткен сара жолымен жүргенін аңғартады. Енді, міне, ғасырлар бойы ұстанып келген, дәстүрлі дінімізден танбай, керісінше, оны терең зерттеуге шақырды.

Баяндама арасында сөз алған Абзал Амиров көрермендерге «Құранда неше сүре бар? Ең қысқа және ең ұзақ сүре қандай?» және т.б. сұрақтар қойып, көпшіліктің таным көкжиегін байқады.

Осылайша, күн тәртібіндегі мәселе қаралып болған соң, сыйлыққа алып келген діни кітаптар таратылды. Ата дәстүріміз ұлықталып, жат ағымдардан сақтандыруға бағытталған жиын өз мақсатына жетті деуге негіз бар. Осы сынды тәрбие мен тағылымға толы семинарлар, ақпараттық түсіндіру шаралары алдағы уақытта да өтетінін айта кеткен жөн.

Алмас АЛДАБЕРГЕН.  [:]