Жаңа жылдың қарсаңында Қарасай ауданы жақсы жаңалықтарға толы болуда. Өткен аптада Жармұхамбет ауылында 600 оқушыға арналған жаңа мектеп ел игілігіне берілді. Ғимараттың салтанатты ашылу рәсіміне Қарасай ауданының әкімі Жасұлан Естенов арнайы қатысып, ұстаздар қауымын, ата-аналар мен оқушыларды қуанышты сәттерімен құттықтады.
Игі шарада аудан әкімі Жасұлан Тоққожаұлы сөз сөйлеп, ауыл халқына Жаңа жылдық ізгі тілегін білдірді. Сондай-ақ аудан басшысы аталған білім ошағында озық ойлы, үздік оқитын оқушылар тәрбиеленіп, биік белесті бағындыратынына сенім білдіріп, мектеп ұжымына сәттілік тіледі.
Ғимараттың ашылу салтанатында оның бой көтеруіне жауапты болған «SP NEFT» ЖШС-нің директоры Нұрлан Қыдырбеков аталған мектеп директорының міндетін атқарушы Мөлдір Есбатыроваға ресми түрде ғимараттың символикалық кілтін табыстады.
Сонымен қатар ауыл ақсақалы Ыбырай атамыз ақ батасын беріп, аудан әкімімен ғимараттың қызыл лентасын қиды. Одан кейін аудан басшысы Жасұлан Естенов үш бөліктен тұратын жаңа мектептің ішін аралап, сапасына мән берді.
Жаңа білім ошағының қолданысқа берілуі осы ауылдағы үш ауысымда оқытып келе жатқан мектептің оқушы санын азайтуға үлкен себеп болмақ. Өйткені елді мекендегі жалғыз мектеп 120 оқушыға ғана арналған. Бұл жайында аудандық білім бөлімінің басшысы Әсел Еркімбаева кеңінен түсіндірді.
– Жармұхамбет ауылында осы күнге дейін жалғыз ғана мектеп болған. Оның өзі 120 балаға арналғанымен, мұнда 960 оқушы үш ауысымда білім алуда. Ал мына 600 орынға деп салынған ғимарат біз үшін үлкен көмек. Себебі аудан бойынша үш ауысым мәселесін шешуге септігін тигізуде. Қазіргі таңда бұл мектепке 610 баланы қабалдап отырмыз. Олар оқу жылының ІІІ тоқсанынан бастап оқитын болады, – деді аудандық білім бөлімінің басшысы.
Айта кетейік, бұл білім шаңырағы Жармұхамбет ауылындағы №2 орта мектебі деп аталады. Оның салынуына тапсырыс беруші – Алматы облысының құрылыс басқармасы.
Жаңа мектепке жауапты болған мердігер мекеме өкілінің айтуынша, нысанды салу кезінде сапаға ерекше назар аударылды. Ғимараттың кіреберісіндегі баспалдақтар фарфордан емес, гранитпен қапталған, ал спортзалға сапалы жабдықтар алынған. Нысанның аумағы абаттандырылған.
Дидар МӘЛІКҰЛЫ.