Қуанышқа бөлеп, көңілдерін сергітті

Жамбыл ауылындағы №2 орта мектеп оқушылары «Нұр Отау» қарттар үйіне арнайы барып, концерттік кеш өткізді. Жастар өз өнерлері арқылы мұндағы қарияларды қуанышқа бөлеп, бір сәт көңілдерін сергітті, сый-сияпат жасады. Өнерлерін ортаға салған жастарды қарттар құрметпен қарсы алды.
Бұл шара 1 қазан – Халықаралық қарттар күніне орай ұйымдастырылған еді. Оқушыларын бастап барған мектептің мұғалімдері жиын басталар алдында қарияларды құттықтап, оларға қажымас қайрат, зор денсаулық тіледі. Құттықтаулармен басталған концерттік бағдарлама әрі қарай оқушылардың жүрекжарды өлең шумақтарымен, ізгі тілектерімен, әсерлі әндерімен жалғасты. Олар әр қарияның көңіліне қуаныш сыйлағысы келді. Бұл мақсаттары орындалды десек те болады. Өйткені, қариялар концертті тек тамашалап қана қоймай, балалармен бірге ән шырқап, көңіл-күйлері көтерілді.
Соңынан бәрі де Жамбыл ауылы №2 орта мектептің ұжымы мен оқушыларына көтеріңкі көңіл сыйлағандары үшін алғыс айтып, оқушыларға ақ жол тіледі.
Шара соңында балалар тәтті үлестіріп, үлкендерден бата алды. Сондай-ақ, мектеп ұжымы қарттар үйіне әдемі картина мен бірнеше сурет салатын фоторама сыйлады.
Ақтоты МЫРЗАБЕКҚЫЗЫ.