Өткен мен бүгіннің арасын жалғайтын киелі шаңырақ

Жыл сайын атап өтілетін ерекше мәдени шаралардың бірі – «Музей түні». Бұл күні музей қызметкерлері келушілерге арнап мазмұнды да қызықты бағдарламалар ұйымдастырады. Түрлі сыйлықтар мен естелік кәдесыйлар тарту етіліп, тарихқа толы рухани кеш өтеді. Сондай-ақ ұлттық салт-дәстүрімізге негізделген ойындар ойнатылып, қонақтардың көңілінен шығатын кешкілік мәдени іс-шаралар ұйымдастырылады. Бұл – уақытты пайдалы әрі мазмұнды өткізудің тамаша үлгісі.
Қарасай аудандық тарихи-өлкетану музейі де жыл сайын осы игі дәстүрді жалғастырып келеді. «Музей түні» шарасының тарихына үңілсек, ол алғаш рет 1997 жылы Германияның Берлин қаласында «Музейлердің ұзақ түні» атауымен ұйымдастырылған екен. Содан бері 18 мамыр – Халықаралық музейлер күні ретінде бүкіл әлемде аталып өтеді.
Музей – өткен мен бүгіннің арасын жалғап тұрған киелі шаңырақ. Ол ұлттың рухани байлығын сақтап, келешек ұрпаққа аманат ететін мекеме. Сондықтан бұл күн – туған жеріміздің, еліміздің сан ғасырлық тарихын дәріптеп жүрген музей қызметкерлерінің төл мерекесі.
Музей қызметкерлерінің басты мақсаты – экспонаттарды халыққа кеңінен таныстырып, мәдениет пен тарихтың дамуына үлес қосу. Осы орайда Қарасай аудандық тарихи-өлкетану музейі де жыл сайын жаңашыл жобалар ұсынып, келушілердің көңілінен шығуға тырысады.
Биылғы жылы «Музей түні» шарасы ерекше форматта өтеді. 2025 жылғы 18 мамыр күні Қонаев қаласының орталық алаңында «Бабалар тілі – музейлер үні» атты мәдени фестиваль ұйымдастырылады. Бұл – ежелгі Таңбалы жартас өнерінен бастап, Алтын адам мен сақ-үйсін дәуірінің мұраларына, батыр бабаларымыздың рухына және ұлы тұлғаларымыздың өнегесіне арналған мазмұнды кеш болмақ.
Аталған шараға Алматы облысы аумағындағы 12 музей қатысып, өз туындылары мен көрмелерін жұртшылық назарына ұсынады. Қала тұрғындары мен қонақтары концерттік бағдарламаны тамашалап қана қоймай, музейлер дайындаған ерекше көрмені көру арқылы оны жүрекпен сезіне алады.
Барша музей қызметкерлерін, әріптестерімізді және музей қонақтарын Халықаралық музейлер күнімен шын жүректен құттықтаймыз!
Наргиза ЕРҒАЗИЕВА,
Қарасай аудандық тарихи-өлкетану музейінің экскурсия жетекшісі.