Тауық табандарын пайдаға жаратқан кәсіпорын

Жылдан жылға өндіретін тауарларын Қазақстан бойынша ғана емес, шет елдерге де экспорттайтын отандық кәсіпорындардың саны артып келеді. Олардың бірқатары Қарасай жерінде де орналасқан. Соның бірі – таяуда тауық табанының өндірісін іске қосқан «Bi Star Group» ЖШС. Қаскелең қаласында бұрынғы жеміс-жидек консерві зауытының өндірістік базасында жұмысын бастаған кәсіпорынның директоры Азамат Жаппасовтың айтуынша, жұмыстар желтоқсан айында басталып, толық өндірістік айналым қыркүйек айында жүйеленген. Оған құйылған жеке инвестиция көлемі – 160 млн. теңге.

Жалпа Қазақстанда тауық табандары итке арналған тағамдарға қосу үшін сатып алынады. Ал мемлекетімізге көршілес жатқан әлемдегі ең ежелгі өркениеттердің бірі болып табылатын Қытай елінде бұл өнім буындарды емдеуге арналған дәрі ретінде қолданылады. Сондай-ақ сыраға арналған тіскебасар ретінде пайдаланылады. «Bi Star Group» ЖШС басшылығы өз кәсібін көршілес халықтың осы бір қажеттілігін ескере отырып, іске асыра бастаған.
Азамат Сабырұлының сөзінше, бұрынғы зауыттың өндірістік базасына ағымдағы жылдың желтоқсан айында қытайлық құрал-жабдықтар әкелініп орнатылса, тамыз айында сынақ ретінде тауық аяқтарының алғашқы топтамасы дайындалған. Ал қыркүйек айында толық өндірістік айналым құрылды. Инвестиция ретінде құйылған 160 млн теңгенің көбі құрал-жабдық алуға жұмсалды.
Қажетті шикізат, яғни тауықтың аяқтары басқа отандық өндіруші – «Алель Агро» АҚ-нан сатып алынады. Барлық шикізат та, дайын өнім де арнайы тоңазытқышта сақталады. Өндіріс орнында төрт тоңазытқыш орналасқан. Оның бірі – амортизатор. Ондағы ауа температурасы минус 40 градусқа жетеді, ал басқаларында минус 20 градусқа дейін барады.
– Арнайы тоңазытқышқа қойылатын өнімдер әп-сәтте қатып қалады. Содан кейін олар тұтынушыларға жіберілгенге дейін кәдімгі тоңазытқыш камераларында сақталады. Жалпы өнімнің бұл түрін шығаруды қолға алғанымыздың басты себебі – тауықтың табаны үлкен сұранысқа ие Қытай Халық Республикасымен іскерлік қарым-қатынас орнату. Қазір Қазақстан мен Қытай арасында біздің өнімдерді Қытайға экспорттау жөнінде келіссөздер жүргізілуде.
Айта кетейін, бұл елге тауықтың аяқтары әртүрлі елден, соның ішінде Бразилия, Иран, Парагвайдан әкелінеді. Алайда біздің қазақстандық құс еті химиялық заттарсыз, жақсы жағдайда ұсталған. Сондықтан біздің экологиялық таза өніміміз бәсекеге қабілетті. Оған сұраныс жоғары болатынына сенімдімін, – деді Азамат Жаппасов.
Кәсіпкердің айтуынша, тауық аяқтары адам ағзасының құрылымдық тұтастығының негізі болып табылатын коллаген мен шеміршектің көп болуына байланысты буындарға аса пайдалы. Олар буын шеміршегін қалпына келтіруге және нығайтуға, оның қозғалғыштығы мен серпімділігін жақсартуға көмектеседі, артрит кезінде ауырсыну мен қаттылықты азайтады. Сонымен қатар, тауық аяқтарының құрамында сүйек пен дәнекер тіндерді қоректендіретін кальций, фосфор, калий және В дәрумендері де бар.
Жаңадан іске қосылған цехтың алаңы 1200 шаршы метрді құрайды. Айта кету керек, жалға алынған үй-жайлар барлық қажетті стандарттарға сәйкес салынған. Анығырақ айтқанда, өндіріс орнындағы едендер арнайы материалдан жасалған. Жұмыстан тыс уақытта цехтарда ультракүлгін, яғни кварцты өңдеу жүргізіледі. Бұл пайда болуы мүмкін вирустарды, бактерияларды, саңырауқұлақтарды және зеңді жоюға, жалпы цехтың ішін зарарсыздандыруға көмектеседі.
Өндірістік айналым туралы айтатын болсақ, ол бірнеше кезеңнен тұрады. Алдымен тауық табандары мұқият жуылады және арнайы аппарат арқылы қажет емес теріден тазартылады. Сонымен қатар +60 градус температурада термиялық өңдеуден өткізіледі.
Дайын аяқтарды жұмысшылар тексеріп, қара өсінді секілді ақаулықтары барларды пышақпен тазалайды. Мұнан соң аяқтардан жіліншіктің кішкене бөлігі алынады. Олар ірі қара мал және ұсақ қара мал азықтандыру, шошқа және құс дәруменге минералды қосымша ретінде пайдаланылатын сүйек ұнын жасауға жіберіледі. Қазірдің өзінде бөлінген аяқтар салмағы мен өлшемі бойынша сұрыпталады. Ең ірілері үшінші санатқа жатады. Олардың барлығы салмағын ескере отырып оралған.
Кәсіпорынның өндірістік қуаттылығы тәулігіне төрт-алты тонна өнім, жұмыс орындарының саны – 23. Мұндағы жұмысшылар – негізінен Қаскелең қаласы мен жақын маңдағы ауылдардың жергілікті тұрғындары. Жаңа тапсырыстар түскен сайын өнімділікті 8 тоннаға, жұмыс орнын 40-қа жеткізу жоспарлануда.
Жұмысын бастағаны аз уақыт болса да «Bi Star Group» ЖШС-ның ауқымы үлкен. Ол болашақта Қазақстан мен Қытай арасындағы өзара ынтымақтастықты нығайту үшін маңызды стратегиялық бизнеске айналуы әбден мүмкін.

Ақтоты МЫРЗАБЕКҚЫЗЫ.