Татулығы жарасқан «Мерейлі отбасылар» марапатталды

Таяуда «Мерейлі отбасы» ұлттық байқауының аудандық кезеңі мәресіне жетіп, жеңімпаздары анықталған еді. Осыған байланысты аптаның сейсенбісі күні аудандық әкімдікте салтанатты шара ұйымдастырылды. Оның барысында конкурсқа қатысып, өнерлерін көрсеткен қарасайлық отбасыларға құрмет көрсетілді.

«Отан – отбасынан басталады» демекші, татулығы жарасқан, мықты мемлекет болу үшін отбасылық құндылықтарды нығайту маңызды. Осы мәселеге терең үніліп, еліміздегі отбасылық институтты нығайтудың қажеттілігін түсінген Тұңғыш Президентіміздің бастамасымен 2013 жылы «Мерейлі отбасы» жобасы қолға алынған еді. Сол уақыттан бері жыл сайын ұйымдастырылып келе жатқан байқау бүгінде өзгелерге үлгі көрсететін ерекше қазақстандық жобаға айналды. Биыл да қоғамға отбасы құндылығын дәріптейтін ұлттық байқауы өз жалғасын тапты.
15 мамыр – Халықаралық отбасы күні аясында аталған конкурстың кезекті аудандық және қалалық кезеңі өтті. Қарасай жерінде ұйымдастырылған биылғы аудандық іріктеу кезеңіне қоғамда өз орны бар, түрлі салада еңбек етіп, ел дамуына сүбелі үлес қосып, жас ұрпаққа өнеге көрсетіп келе жатқан 8 отбасы қатысты. Олардың қатарында ұстаздар әулеті, кәсіпкерлер, спорт және мәдениет саласының үздіктері болды.
15 мамыр мен 15 маусым аралығында байқауға қажетті құжат қабылданды. Одан соң 15 күн аралығында қазылар алқасы отбасылардың портфолиосымен және арнайы түсірген бейнероликтерімен танысып, бағалады.
Аудандық ішкі саясат бөлімі ұйымдастырған байқау нәтижесінде үздік үштіктен Бірінші Май ауылдық округінен қатысқан Альменбетовтер отбасы көрінсе, екінші орынға Жамбыл ауылдық округінен Аширалиевтер, бірінші орынға Жібек жолы ауылдық округінен Қыдыралиевтер лайық деп танылды. Ал қарсыластарынан оза шапқан қаскелеңдік Бекдайыр әулеті байқау жеңімпазы атанып, бас жүлдені иеленді. Осылайша қолөнерді ұрпақтан-ұрпаққа жалғап келе жатқан көп балалы, шеберлер отбасы облыстық кезеңге өтіп, аудан атынан сынға түсетін мүмкіндікке ие болды.
Ал жоғарыда аталған жеңімпаздарды марапаттау мақсатында аудандық әкімдікте салтанатты шара ұйымдастырылды. Байқау қатысушыларының басы қосылған жиынды аудандық ішкі саясат бөлімінің басшысы Асылхан Еспаев ашып, жиналған өнерлі отбасылардың мүшелеріне «Мерейлі отбасы» ұлттық байқауына қатысып, белсенділік танытқандарына ризашылығын білдірді. Сондай-ақ олардың бақ сынауы жастарға үлгі, жұртқа мақтаныш екен айтып, аудан әкімінің орынбасары Бексұлтан Ақылбек атынан марапаттарды табыс етті. Ашып айтқанда, жүлдегерлерге І, ІІ, ІІІ дәрежелі дипломдар мен бағалы сыйлықтар берілді. Ал аудандық кезеңде белсенділік танытқан қалған төрт отбасы аудан әкімінің орынбасары Бексұлтан Ақылбектің Алғыс хатымен марапатталды.
Зергерлік, тігін және ұлттық бұйымдар жасаумен айналысып, ата-бабамыздан қалған қолөнерді дамытып, насихаттаумен қатар, игі істерге белсене араласып, қайырымдылық жұмыстарына ат салысып жүрген Бекдайырлар әулетін аудандық іріктеудегі жеңістерімен құттықтаймыз. Мәдени іс-шараларға белсене қатысып, көрмелерімен халықты қуантып жүрген шебер отбасына облыстық іріктеуден де сәтті өтіп, жеңімпаз атануларына тілектеспіз!

Ақтоты МЫРЗАБЕКҚЫЗЫ