Таланттылардың талабын ұштайтын өнер ордасы

3000-ға жуық халқы бар, ұлт пен ұлыстың бірлігі жарасқан Ұмтыл ауылдық округіндегі ерекше ғимараттардың бірі – Мерей ауылындағы Мәдениет үйі. 40 жылдан астам тарихы бар өнер ордасында былтыр күрделі жөндеу басталып, биыл көктемнің алғашқы айында қолданысқа берілді. Бұл ғимарат Қарасай жеріндегі аудандық Мәдениет үйінен кейінгі округтер арасындағы әзірге ең үлкен әрі ең көп көрермен сиятын өнер ошағы болып табылады. Жақында ғимараттың тарихымен танысып, бүгінгі тыныс-тіршілігіне көз жеткізіп қайттық.

Ұмтыл ауылдық округіндегі Мәдениет үйінің іргетасы сонау 1982 жылы қаланып, бір жылдан кейін қалың көпшілікке есігін айқара ашқан. Осы жылы оның алғаш директоры болып еңбек сіңірген қайраткер Александр Пантелеев тағайындалып, 1993 жылға дейін жетекшілік еткен. Ал Кеңес үкіметі ыдырағаннан кейін Мәдениет үйі өз жұмысын тоқтатуға мәжбүр болған. Тек 2000 жылдан бастап ғимарат қайта жаңғырып, халыққа қызмет ете бастапты. Одан кейінгі жылдары да мекеме күрделі жөндеулерден өткен. Бұл жайында Мәдениет үйінің қазіргі директоры Мурал Әкім сөз етіп, әңгіме барысында жалпы нысанның аумағы жайлы, бүгінгі жағдайы мен алдағы жоспарларына қатысты ақпаратымен бөлісті.
– Мерей ауылындағы Мәдениет үйі алғаш күрделі жөндеуден 2010 жылы өткен. Араға 14 жыл салып, міне қайтадан жаңғыртылып жатыр. Былтыр жөндеу жұмыстары басталып, биыл наурыз айында қайта қолданысқа берілді. Жалпы аумағы 2248 шаршы метрді қамтиды. Жөртөлесімен бірге үш қабатты болып саналады. Ал көрермен залына 250 адам емін-еркін сияды. Бүгінгі таңда өнер ошағында 15 үйірме бар және олардың бәрі тегін. Яғни өнерге, спортқа қабілеті бар кез келген жас бала бізге келіп өз қабілетін шыңдап, осы жерде өнер көрсете алады. Ол жерде жас ерекшелігі талап етілмейді. Сондай-ақ қазіргі уақытта ауыл жастарынан құралған көркем өнерпаздардың бар екенін айтқым келеді. Ансамбль ретінде олар да алдағы уақытта өнерсүйер қауымға әуезді әндерін шырқайды, – деп өнер ордасының басшысы ойымен бөлісті.
Айтпақшы, аталмыш өнер ошағында Мерей ауылының мерейін арттырып жүретін ардагерлердің хоры бары екенін айрықша атап өтуге болады. Өнерді жанымен сүйетін қариялардың ауылдың алты ауызы ретінде шырқайтын әндері көп. Мурал Әкімұлының айтуынша, қарттарымыз әрдайым жастардан қалыс қалмай, түрлі шараларда ән салып, көрермен ықыласына бөленуде.

Ал Мәдениет үйіндегі шығармашылық үйірмелер тек өнерге ғана емес, спорттық бағытта да шыңдайтынын айта кетуге болады. Оның ішінде «Дурия» және «МИКС» би студиялары, «Юнити» эстетикалық гимнастика, «Домбыра», «Тоқу», «Сахна тілі», «Актерлік шеберлік», «Улыбка» «Сурет салу» сияқты вокалдық, қолөнерлік үйірмелері жас жеткіншектерді түрлі өнерге баулиды. Сонымен қатар күрес, каратэ, бокс сияқты спорт түрлерінен де тәлім алуға болады.
Өнер ошағының өткен тарихына көз тастар болсақ, дәл осы үйірмелерден кезінде қарым-қабілетін, дарынын ұштап, жетістікке жеткендер көп. Тіпті, кейбірі шет мемлекетке дейін шығып, есімін әлемге танытқан. Осындай мақтаныштар туралы мекеменің тәжірибелі қызметкері, бүгінгі таңда әдіскер міндетін атқарып жүрген Жазира Данибекова кеңірек тоқталды.
– Мәдениет үйі алғаш есігін ашқалы бері осы уақытқа дейін жеткен жетістіктері аз болмады. Спорттық секциялар мен шығармашылық үйірмелерге қатысқан шәкірттер ел ішінде ғана емес, шет мемлекетке шығып өнер көрсетті. Соның бірі – әртіс, композитор, вокалдық коуч, «Геликон-опера» музыкалық театрының солисі болған, қазіргі таңда Berlin Opera академиясында жұмыс істейтін Александр Клевич. Тағы бір мақтанышымыз – Малика Ельчибаева. Ол кезінде би үйірмесінің жетекшісі болған Людмила Ногайдың шәкірті атанып, жастығына қарамастан балетке қатысып, ең үздік партияларды орындап, Абай атындағы опера және балет театрының прима-балеринасы болды. Сонымен қатар Ресей мемлекетінің Мәскеу қаласында өткен XIV Халықаралық балет байқауында жүлделі 2-орын иегері атанды. Людмила Филипповнаның талантты шәкірттерінің бірі – Маржан Қалжанова қазіргі таңда біздің Мәдениет үйімізде «Дурия» би студиясының жетекшісі қызметін атқаруда, – деп Жазира ханым жетістіктердің біразын тізіп өтті.
Қазіргі уақытта өнер ошағындағы үйірмелердің атқарып жатқан жұмыстары баршылық және мақтауға тұрарлық деуге де болады. Оның ішінде көркем гимнастика жетекшісі Людмила Юрасова-ның, сурет салудан орыс және қазақ топтарының жетекшілері Светлана Ратееваның, Айғаным Орынғали-қызының, «МИКС» би студиясының жетекшісі Александра Михнюктің, «Актерлік шеберлік» және «Сахна тілі» үйірмелерінің жетекшісі Гүлсім Жалғасбаеваның, «Домбра» жетекшісі Ғалия Аяптың, «Улыбка» вокал үйірмесінің жетекшісі Елена Самочернованың еңбектері елеулі. Әрбірі көптеген халықаралық, республикалық байқаулардан жүлделі орындарға ие болуда.
Спорттық секциялар жайлы айтар болсақ, бұл бағытта жеңіс тұғырынан көрінген өрендер аз емес. Мәселен, Темірлан Арашов баптаған Мадияр Абдыкарымов 2024 жылы Ресейдің Якутск каласында өткен Азия ойындарында еркін күрестен күміс жүлдегер атанса, Киокушинкай каратэден жаттықтыратын Ерік Даулеткалиевтің қос шәкірті – Әлішер Есіркеген мен Алексей Кормишкин үздіктер қатарынан көрінді.
Көрермен көңілін ойлайтын Мерейдегі Мәдениет үйінің жетістіктері әлі де көп боларына сенеміз. Шығармашылық ұжымның жұмысы жанданып, жақсы жаңалықтарымен ауылдастарын сүйіншілей берсін деген тілегіміз бар.

Дидар МӘЛІКҰЛЫ.