Алматы облысы аудандарында кезекпе-кезек еліміздің солтүстік өңірлерінен келген бір топ делегация жұмыспен қамту мәселесі бойынша халықпен кездесулер өткізуде. Ал, жуырда олар біздің ауданға табан тіреп, аудандық мәдениет үйінде «Өңіраралық бос жұмыс орындары» жәрмеңкесін ұйымдастырды.
«Нәтижелі жұмыспен қамтудың және жаппай кәсіпкерлікті дамытудың 2017-2021 жылдарға арналған бағдарламасы» шеңберінде өткен жиында екі жүзден астам азамат өтініш білдіріп, солтүстіктен жұмыс табуға өз ниеттерін білдірді. Оған қарасайлықтардан бөлек Жамбыл, Іле аудандарының тұрғындары және Алматы облыстық жұмыспен қамту, үйлестіру және әлеуметтік бағдарламалар басқармасының бас маманы Жарқын Жақсыбеков, Қарасай ауданы әкімінің орынбасары Мақсұт Жапаров, аудандық жұмыспен қамту және әлеуметтік бағдарламалар бөлімінің басшысы Әлия Қыйлыбаева және аудандық жұмыспен қамту бөлімінің басшысы Элмира Тасырова қатысты. Жалпы, онда жұмыссыз азаматтарға арналған әртүрлі тиімді ұсыныстар айтылып, мектеп бітіруші түлектерге «Серпін» бағдарламасы жайлы толық түсіндіру жұмыстары жүргізілді. Делегация құрамында СҚО жұмыспен қамту және әлеуметтік бағдарламалар бөлімі басшысының міндетін атқарушы Жылқыбай Сүлейменов, ауыл әкімдері, жұмыспен қамту саласының өкілдері мен жұмыс берушілер де бар. Олардың айтуынша, Солтүстік Қазақстан облысында 7 млн. гектардан астам жер бар. Еліміз бойынша ең үлкен егістік жері болғанымен, өңір еңбек күшінен тапшылық көруде. Сондықтан да 270 мыңнан астам тұрғыны бар Қарасай ауданындағы жұмыс іздеген азаматтарды Солтүстік Қазақстан облысына тартуды мақсат етуде. Ол үшін арнайы бағдарламалар да бар екен. Сонымен қатар, ұсыныс ұнап, жұмыс істеу үшін солтүстікке көшемін деушілерге бірқатар көмек те көрсетіледі. Мәселен, үймен, жермен қамтып, кәсібі мен шаруашылығын дөңгелетуге бағыт-бағдар беріледі. Онда педагогикалық, техникалық, басқа да мамандықтар бойынша бос орындар көп екен. Жәрмеңке соңында делагаттардың ұсынысына құлақ асқан 46 отбасы мүшелері нақты келісім беріп, нәтижесінде, енді таяу күндері солтүстікке көшуге қамданатындарын да жеткізді.
Бақдәулет ТАЛИПОВ.