Үшқоңыр тауының етегінде орналасқан, жыл өткен сайын дамып, көркейіп келе жатқан Шамалған ауылдық округі еліміздегі 30 үздік ауылдардың қатарына кірді.
Өткен аптада елордамыз Нұр-Сұлтан қаласында «Тұлға-достық» қоғамдық қорының директоры, ақын Мұратхан Шоқан жазған «Үздік 30 ауыл» анықтамалық альбомының тұсаукесері болды. ҚР Ұлттық академиялық кітапханасында өткен шараға Ұлттық экономика вице-министрi Әлішер Әбдіқадыров, Сенат депутаты Нұртөре Жүсіп, Мәжіліс пепутаты Мақпал Мыса мен «Jas Otan» Жастар қанатының төрағасы Нұржан Жетпісбаев қатысты.
Ел Тәуелсіздігінің 30 жылдығына орай жарық көрген кітап авторының айтуынша, бұл жинақ үздік ауылдарды өзге ауылдарға үлгі-өнеге етіп, ауылын көркейтуге өлшеусіз үлес қосып жүрген іскер азаматтарды дәріптеуге бағытталған. Жинақты басып шығару үшін Мұратхан Шоқан жаз бойы еліміздің барлық өңірін арнайы аралап, инфрақұрылымы мен тұрғындардың тұрмысы жақсы ауылдар жайлы ақпарат жинаған. Барлық мәліметті жинақтап, күн санап көркейіп, гүлденіп келе жатқан болашағы зор 30 ауылдың тізімін жасаған. Солардың қатарына біздің ауданымызға қарасты Шамалған ауылдық округі де кіргізілген. Бұл кітапта өсіп-өркендеп, дамып келе жатқан ауылдың жетістіктері көрсетілген.
Осы ретте аптаның дүйсенбісі күні аудандық әкімдіктің мәжіліс залында Шамалған ауылдық округінің әкімі Ержас Тоқтасынов ауданның алға басып, дамуына және де өзге аймақтарға үлгі болуына үлкен үлесін қосып жүрген аудан басшысы Жандарбек Далабаевқа Қазақстан жазушылар одағының мүшесі Мұратхан Шоқанның атынан ризашылық білдіріп, Алғыс хат табыс етті.
Айта кетейік, аумағында ауданымыздағы ең ірі «Үшқоңыр» спорт кешені, ҚР Тұңғыш Президенті «Атамекен» тарихи-мәдени орталығы сияқты нысандар орналасқан округ ауданымыздағы қарқынды түрде дамып келе жатқан елді мекендердің бірі. Бүгінде ауылдың келбеті ауыз толтырып айтарлықтай өзгеріп, оның экономикасы мен өндіріс салалары да жетілуде.
Биылдың өзінде округте үйлер салынып, көптеген жолдар жөндеу жұмыстарынан өтуде. Ауыл жастарына арналып, мектептер, «Ана Нұры» сияқты саябақтар, «Work Out», «Street Workout» алаңдары салынуда.
Жергілікті тұрғындардың жағдайын жасау мақсатында округ бойынша түрлі нысандардың іргетасы қаланып, нәтижелі жұмыстар атқарылуда.
Ақтоты МЫРЗАБЕКҚЫЗЫ.