Шұңқырларды жөндеу жұмыстары басталды

Аудандық маңызы бар жолдарды жөндеуге жауапты «ОРСЕП ДОР СТРОЙ» компаниясы Қаскелең қаласындағы орталық көшелердің жолдарындағы шұңқырларды жөндеу жұмыстарына кірісті.
Осы аптада В.Белинский атындағы орта мектептің жанындағы Аймауытов көшесін ретке келтіру басталды. Арнайы техниканың және жұмысшылардың көмегімен жолдың бетіндегі шұңқырлар тазартылып, оның беті жаңа асфальтпен тегістелді.
Мұндай ойықтарды жөндеу басқа да көшелерде жүзеге асырылады. Қарасай ауданының жолаушылар көлiгi және автомобиль жолдары бөлiмiнің мәліметіне сүйенсек, Қаскелең қаласы бойынша алдағы уақытта Өмірәлі, Байғазиев, Төле би, Қарасай, Мақашев, Жанғозин, Райымбек, Достық, Бейсебаев көшелері мен «Алтын ауыл» ықшам ауылының кіре беріс жолындағы ойылған асфальт беті тегістеледі. Сондай-ақ қала ішіндегі басқа да негізгі көшелерді ретке келтіру жоспарда бар.
Айта кетейік, ағымдағы жылдың 1 наурызынан бастап «ОРСЕП ДОР СТРОЙ» ЖШС аудандағы жол жиектерін қыс бойы жиналған құм мен балшықтан тазарту жұмыстарын атқарған болатын. Аталмыш компания келісімшарт негізінде жыл соңына дейін аудан көлеміндегі жолдарды орташа жөндеу, оларды жамау, жол белгілерін орнату мен жол жиектерін тазарту, сондай-ақ қыз мезгілінде қардан тазалау жұмыстарын атқарады.
Өз тілшіміз.