Саяжайларды ауыл аумағына кіргізу жоспарлануда

Бүгінде Қарасай ауданы Алматы облысындағы халқы тығыз орналасқан ең ірі аудандардың бірі болып табылады. Жыл өткен сайын тұрғындар саны тек өсуде. Бұған сәйкес ауданда жаңа құрылыстар, саяжайлық бірлестіктер мен бау-бақша серіктестіктерінің саны да артуда. Алайда саяжайлар о бастан үй ретінде тұруға емес, маусымдық жұмыстарға арналған жер болғандықтан, бүгінде оны баспана ретінде қолданып отырғандар біраз мәселелер туғызып отыр. Елді мекен мәртебесі болмағандықтан, мұнда инфрақұрылым, инженерлік желілер, мектеп, балабақша, емхана сияқты әлеуметтік нысандар жоқтың қасы. Адамдар қыстың күні қар, күз және көктем айларында балшық басып жұмысқа, оқуға баруды. Жалпы мұндай мәселе барлық саяжайларда бар.
Өзектілігі артқан мәселені шешу мақсатында Мемлекет басшысы оларды елді мекендерге қосып, инфрақұрылым мәселесін ретке келтіруді тапсырған. Осыған байланысты өткен жылдан бері Қарасай ауданының аумағына қарасты саяжайларды елді мекендердің құрамына қосу бағытында белсенді жұмыстар жүргізіле басталған еді.
Нәтижесінде 2024 жылы ауданда 101 саяжай алты елді мекенге қосылған. Яғни Қырғауылды ауылына 21, Алмалыбақ ауылына 26, Қошманбет ауылына екі, Елтай ауылына бес және Долан ауылына төрт саяжай учаскесі енгізілген.
Сондай-ақ аудандық сәулет және қала құрылысы бөлімінің мәлімдеуінше, 2024 жылға арналған бюджеттік өтінім бойынша саяжайлық қоғамдастықтары бар елді мекендердің тізбесі жасалып, облыстық сәулет және қала құрылысы басқармасына қала құрылысы құжаттамасын жасау үшін бюджеттік өтінім жіберілген.
Аталған тізімге мыналар кірді:
Әйтей ауылдық округінің құрамына кіретін Үштерек ауылындағы жалпы аумағы 111,75 гектарды құрайтын үш саяжай аталмыш елді мекеннің құрамына кіретін болады. Олар – «Дархан», «Арай» бау-бақша серіктестіктері мен «Тұрар-Баркөл» сүт фермасы.
Ұмтыл ауылдық округі бойынша Жалпақсай ауылының қарамағына «Тан 2030» және «Нұр Бағы» атты екі саяжай мен оған іргелес ауданның қорында жатқан жалпы аумағы 59,2 га жер енгізіледі.
Елтай ауылдық округі қарасты Береке ауылының аумағына бес саяжай кіреді: «Асыл ел», «Прицевод», «Нұр Плаза», «Ырыс Думан» және атауы жоқ жалпы аумағы 5,0 га ТК-ББ (ПКСТ).
Исаев ауылының аумағына екі саяжай кіреді: «Айсезім» және «Нұр Плаза». Шамалған ауылдық округіндегі бір елді мекеннің аумағына 11 саяжай кіреді: «Геофизик», «Монтажник», «Алатау-байқоңыр», «Эдельвейс», «Алатау», «Дорожник», «Шамалған», «Үшқоңыр», «Зоренька», және «Автомобилист». Бұған қоса жалпы ауданы 120,32 га атауы жоқ алты саяжай қосылады.
Жамбыл ауылдық округіне қарасты Батан ауылының шекарасына аумағы 44 га үш саяжай кіргізіледі. Олар – «Аэрофлот», «Мечта» және «Водник».
Райымбек ауылдық округі бойынша Бұлақты ауылының аумағына жалпы көлемі 50 га атауы жоқ саяжай қосылады.
Жібек жолы ауылдық округіндегі 1-ші елді мекенге «Түрксіб» және 3 атауы жоқ саяжай мен жалпы ауданы 1406,4 га болатын өндірістік аймақ кіргізіледі.
Іргелі ауылдық округіне «Алтын Орда» базарының аумағын және «Асыл арман» тұрғын үй кешенінің алдындағы жол бойындағы аумақ 1-ші елді мекеннің құрамына қосылады.
Ал ағымдағы жылға арналған бюджеттік өтінім бойынша саяжайлық қоғамдастықтары бар елді мекендердің тізбесіне сәйкес, Көлащы, Тұрар, Кемертоған, Бекболат елді мекендерінің құрамына жалпы ауданы 209,55 га 11 саяжай қосылатын болады.
Жалпы жоспарға сәйкес жыл сайын өз кезегімен аудан аумағындағы саяжайлық бірлестіктер мен бау-бақша серіктестіктері толығымен елді мекен аумағына енгізіліп, «ауыл мәртебесін» алатын болады.

Ақтоты МЫРЗАБЕКҚЫЗЫ.