Сәулеті мен сәні жарасқан назардағы нысандар

Сарыарқаның төсінде бой көтерген бас қаламыз – Астананың жаңа дәуірде қалыптасқанына биыл 27 жыл толып отыр. Еңсесі биік елордамыздың талай тарихқа куә екендігі сөзсіз. Алғаш рет 1994 жылы 6 шілдеде Қазақстан Жоғары Кеңесі ел астанасын Алматыдан Астанаға көшіру туралы шешім қабылдады. 1997 жылы 10 желтоқсанда ресми түрде Ақмола қаласына көшіріліп, 1998 жылы оның атауы Астана деп өзгертілді. Бұл – саяси және экономикалық тұрғыдан алға даму мақсатында жасалған көреген қадамның бірі еді. 2008 жылы елімізде 6 шілде Астана күні ретінде жарияланып, содан бері тойланып келе жатыр. Бұл — мейрам тәуелсіз Қазақстанның жаңа кезеңге аяқ басуын білдіретін тарихи шешімнің символы.
Астананың даму жолы және сәулет өнеріндегі жаңалықтар жетерлік. Ширек ғасырға жуық кезенде бас қаламызда айтулы әрі ерекше өзгерістер орын алды. Елордамызда заманауи сәулет үлгісімен ұлттық нақыштағы ғимараттар салынып, өзге елдермен тереземіз тең екенін айшықтады. Ендеше, осынау назардағы нысандар жайлы қысқаша сипаттап өтсек, артық болмас.

Бәйтерек –Тәуелсіздіктің мәңгілік белгісі.
Астананың дәл жүрегінде орналасқан Бәйтерек монументі – Қазақстанның тәуелсіздігі мен ел болашағына деген сенімінің көркем символы. Халық арманы мен еркіндігінің бейнесі.
Бәйтерек – Қазақстан Республикасының Тұңғыш Президенті Нұрсұлтан Назарбаевтың идеясы негізінде салынған. Нысанның тұжырымдамалық негізі көкке ұмтылған өмір ағашы, яғни қазақтың ежелгі «Бәйтерек» туралы мифіне сүйенеді.
Бәйтерек 2002 жылы ресми түрде ашылды. Биіктігі – 97 метр, бұл елорданың астана болған 1997 жылын білдіреді. Шар тәріздес алтын түсті конструкция – диаметрі 22 метрлік шыны капсула. Ол күн бейнесінің символы екенін көрсетеді. Бұл шардың ішінде «Аялы алақан» композициясы орналасқан. Онда Қазақстанның Тұңғыш Президентінің қолының табы бар.

Әзірет Сұлтан мешіті – рухани құндылықтың ордасы
Көк күмбезімен көздің жауын алатын «Әзірет Сұлтан» мешіті – құлшылық ететін рухани орда. Бұл 2012 жылы ашылып, сол уақыттан бері елорданың рухани-мәдени орталығына айналды. Жалпы ауданы – 11 гектар, ал бір мезгілде 10 мың адамға дейін сыйғыза алады. Ғимараттың күмбезінің биіктігі – 51 метр, ал төрт мұнарасының әрқайсысы – 77 метр. Мешіттің атауы халқымыздың рухани мұрасын дәріптеген – Қожа Ахмет Яссауиге арналған. Бұл атау елдің діни дәстүрі мен қазіргі өмірінің сабақтастығын көрсетеді.

Хан Шатыр – Ұлттық болмыс пен заманауи сәулеттің тоғысы.
Киіз үй пішіндес «Хан Шатыр» ғимараты атақты сәулетші Норман Фостердің жобасымен салынған. Ол сауда, ойын-сауық және мәдени демалыс орны ғана емес, дүниежүзіндегі ең үлкен шатыр пішіндес нысан. Оның биіктігі – 150 метр, ал аумағы – 127 мың шаршы метрден асады. Хан шатырдың ішкі бөлігінде жасанды жағажай, тропикалық бақ, ойын-сауық алаңдары мен бутиктер орналасқан.
Хан Шатыр – қазақ мәдениетінің және технологиялық жаңашылдықтың үйлесімін көрсететін сәулет туындысы.

ЭКСПО-2017.
ЭКСПО – 2017 халықаралық мамандандырылған көрмесі – Астананың ғана емес, бүкіл Қазақстанның даму жолындағы ерекше тарихи белесі. Бұл ауқымды шара елорданың әлемдік диалог, технология және жасыл энергетика орталығына айналғанының дәлелі болды.
ЭКСПО-ға 115 ел мен 22 халықаралық ұйым қатысып, өздерінің инновациялық жобаларын, технологиялық жетістіктерін, және мәдени мұрасын таныстырды. Мемлекетіміз үшін бұл жаңа деңгейдегі ғылыми, дипломатиялық және туристік серпіліс болды.

Орталық Азиядағы ең үлкен мешіт.
2022 жылы Астанада салынған республикалық бас мешіт бүгінгі таңда Орталық Азиядағы ең ірі құлшылық ордасы болып саналады. Ол ел Тәуелсіздігінің 30 жылдығына арналған маңызды нышандардың бірі ретінде салынған. Оның басты ерекшелігі аумағы 10 гектар, ал сыйымдылығы 30 мың адамға арналған. Мешіттің сәулеті ислам архитектурасының дәстүрін, сондай-ақ қазақы ою-өрнек пен рухани символиканы біріктіреді.
Иә, 6 шілде – бұл жай күн емес, бұл — ғасырлар мен мәдениеттің арасындағы алтын көпір. Оған дәлел, осы мереке қарсаңында есте қалар оқиғалардың болуы. Мысалы, 2015 жылы Астананың 17 жылдығына арнап өткен іс-шарада «Тайқазан» атты акция аясында 736,5 кг ұлттық ас пісірілген. Бұл ең ірі тағам ретінде Гинесс рекордтар кітабына кірді. Тәуелсіздік жылдарынан бастап, Астана қаласы халықаралық оғиғалардың орталығына айналды. 2003 жылдан бері әлемдік және дәстүрлі діндер көшбасшыларының съезі тұрақты түрде өткізіліп келеді.
Астана күні – еліміздің жаңа тарихының бастауы. Бұл мереке – тек қаланың туған күні ғана емес, бүкіл елдің жаңғыру жолындағы жетістіктерін ұлықтайтын маңызды күн

Әділет ЖАЛҒАСБЕКҰЛЫ