Жақында аудандық кітапхананың ұйымдастыруымен «KITAP TIME» атты ауқымды іс-шара өтті. Жұмыс аяғында басталған шараның түпкі мақсаты – кітапхананың қай уақытта да зейінді оқырман үшін қолайлы екендігін көпшілікке жеткізе отырып, мейілінше оқырмандарын осы ортаға жақын тарту.
Ерекше форматта өткен мазмұнды шараның оқырмандар үшін мәні зор болды. Өйткені, бұл күні әдетте тыныштық сақтайтын кітапхана ғимаратында келушілерге қатты сөйлесуге, ойнауға және күлуге ерекше мүмкіндік берілді. Кітапханашылар қауымы жиналғандарға жарқын мерекелік көңіл-күй тудыруға тырысты, кітапхана ғимаратын безендірді, өздерінің қиялдары мен шеберліктерін көрсетті. Сондай-ақ шарада қызықты ойындар ойнатылып, әуезді әндер шырқалды.
Аталмыш шараға аудан әкімінің орынбасары Рустам Атшабаров, аудандық ішкі саясат, мәдениет, тілдерді дамыту және спорт бөлімінің басшысы Күлжан Дүйсенова, Қазақстан жазушылар одағының мүшесі, Қазақстанның құрметті азаматы Мақсұтқан Дәлейұлы және ауданымыздың ардагерлері мен кітапсүйер қауым қатысты.
Кеш бағдарламасы алдымен арнайы дайындалған көрмеден басталды. Онда қонақтар кітапхана қорындағы қызықты кітаптармен, балаларды қызықтыру үшін жазушылардың бейнесінде жасалған, арнайы мобильді бағдарлама арқылы оқуға да, көруге де, тыңдауға да болатын электронды кітаптармен таныса алды.
Шараның негізгі бөлігінің шымылдығын аудан әкімінің орынбасары Рустам Әмірғалиұлы ашып, рухани және мәдени дамудың басты құралы кітап оқудың өміршеңдігін жеткізе келе, кітапхана түніне сәттілік тіледі. Сондай-ақ осындай қызықты әрі мазмұнды шараны ұйымдастырған кітапхана басшысы Ұлдархан Өтеева мен кітапханашыларға алғысын білдірді. Мұнан кейін Күлжан Дүйсенова кітаптың өмірдегі маңыздылығына тоқталса, Мақсұтқан Дәлейұлы өзінің жазушылығы жайлылы айтып өтті.
Негізгі бөлімі сұхбат форматында өтіп, оның барысында «Өнер қиылысы» айдарына «Славян базары – 2023» халықаралық конкурста жеңіске жеткен өнерпазымыз Шерхан Арыстан мен оның ұстазы Қалбибі Абдуллаева арнайы қонақ ретінде шақырылды. Тәлімгер мен шәкірті байқауға қалай қатысқандарын және одан қандай әсер алғандарымен бөлісті. Сондай-ақ Қалбибі Абдуллаева жас өнерпазбен қалай танысқанын, оның әншілік жолға түпкілікті түсуге ықпал еткенін айтып берді.
Кештің тағы бір құрметті қонағы ретінде шақырылған жас журналист, блогер Әбдрахман Қалиев болса жиналған жастарға «Қазіргі қоғам жастардың көзімен» атты тақырыпта тренинг өткізді.
Шараның соңғы бөлімінде лотерея ойыны ұйымдастырылып, 20-дан астам жеңімпазға әртүрлі сыйлық берілді.
Жалпы әр бөлімі ерекше форматта өткізіліп, неше түрлі қызықты ойындарға толы болған шара қатысушыларды тамаша көңіл-күйге бөледі.
Оқырмандарды қызықты да тылсым кітап әлеміне тартқан кештің соңы «Кітапхана түніне» ұласты.
Ақтоты МЫРЗАБЕКҚЫЗЫ.