Республика күні қарсаңында Талғар ауданында мерекелік шаралар өтіп, ел қуанатын жағымды жаңалықтарға толы болды. Солардың бірі – Тұздыбастау ауылында спорт шебері, грек-рим күресінен Қазақстан Республикасының чемпионы Қанат Жақсылықов атындағы «Qanat» спорт кешенінің ашылуы.
Салтанатты шараға аудан әкімі Танат Айдарбеков арнайы қатысып, құттықтау тілегін арнады. Сондай-ақ бұл жиынға аудан спортшылары, Олимпиада, Азия чемпиондары, ауыл мен аудан әкімдері, марқұм болған спортшының жолдастары, тұрғындар қатысты.
– Ауданымыз спортты дамыту жөнінде облыстағы ең үздік аудандардың бірі. Біз тек өз ауданымыз ғана емес, өңіріміздің, бүкіл еліміздің абыройын қорғап, үздіктер қатарынан көрініп келе жатқан мықты спортшылармен мақтануға толық құқымыз бар. Бүгін біз тек жастардың күрес түрлерімен шұғылдануы үшін салынған спорт кешенінің ашылу салтанатына ғана емес, сонымен бірге әйгілі спортшы, грек-рим күр
есінен спорт шебері, жерлесіміз Қанат Жақсылықовтың жарқын бейнесін еске алу үшін де жиналып отырмыз. Осындай даңқты жерлесіміздің атын иеленген бұл спорт кешені еліміздің намысын қорғайтын талай мықты спортшыларды өсіріп, тәрбиелей беруіне тілектеспін, – деп аудан басшысы құттықтау тілегін арнады.
Сондай-ақ аудан әкімі аталған спорт кешенін салуға атсалысқан азаматтарға, ауданның атын шығарып, бұқаралық спорт пен дене шынықтыруды дамытуға елеулі үлес қосқан азаматтарды құрмет грамоталарымен марапаттады.
Шара барысында Алматы облысы күрес федерациясының президенті Дамир Күзембаев та сөз алып, Қазақстан Республикасының грек-рим, еркін күрес және әйелдер күресі федерациясы атынан барша жиналғандарды спорт кешенінің ашылу салтанатымен құттықтады.
– Талғар ауданының спорт сүйер жасөспірімдері үшін осындай заманауи спорт кешенінің ашылуы үлкен қуаныш. Спорт саласы еліміз үшін ерекше назар аударатын басым бағыттардың бірі. Республика басшылығының сындарлы саясатының негізінде бүгінгі халықтың экономикалық әл-ауқатымен қатар дене шынықтыру мен спортты дамыту деңгейі артып келеді. Осы кешеннен болашақта үлкен Олимпиада, Азия чемпиондары мен жеңімпаздары шығады деп үміттенеміз.Игілікті іс-шараға бастамашы болған, ауыл балаларының дамуы үшін, спортпен шұғылданып, дені сау ұрпақ тәрбиелеуге қосқан үлесі үшін марқұм Канаттың бауыры, Азия ойындарының чемпионы Дәулет Жақсылықовқа, демеушілер мен кешенді салуға көмектескен азаматтарға үлкен ризашылығымызды білдіремін, – деді федерация президенті Д.Күзембаев.
Ізгі тілектер ақтарылып, толассыз алғыс айтылған соң аудан әкімі Танат Айдарбеков пен облыстық мәслихат депутаты Билалдин Ушуров «Qanat» спорт кешенінің қызыл лентасын қиып, жиналған қауыммен жаңа ғиамаратты аралады. Ауыл ақсақалдары ақ батасын беріп, ақ жаулықты әжелер шашу шашты. Салтанатты басқосудан кейін мейрамханада марқұм Қанат Жақсылықовтың рухына Құран бағышталып, ас берілді.
Сәуле ҚҰРМАНТАЕВА.
Талғар ауданы.