Қолыңнан келсе, туған жеріңе, ыстық ұяңа жақсылық жасағанға жетпейді?! Құшағынан табылып, жылы сөзіңді арнап, жүргеніңнің өзі қарапайым ауыл адамдарының көңілдерін көтеріп тастайды. Туған жеріңе арнап кітап жаз, поэма, дастан арна, өлмес ән мен күйге арқау ет, артық етпейді. Бойыңда бар жақсы қасиетіңмен, дарыныңмен шуақ шашып кеткеннің өзі неге тұрады десеңізші?!
Кеген ауданындағы Ұзынбұлақ ауылынан шыққан сан қырлы талант иелері, әсіресе, өнер жағында жүрген түлектері бастарын қосып, туған ауылдарының төрін ән мен жырға бөлеп қайтты. Мұндай жақсылық ауылдағы Мәдениет үйі күрделі жөндеуден өткізіліп, жаңғырып, жайнап, құшағына жылу, тамырына қан жүгіргелі көбейе түскендей. Бәрекелді!
Мәдениет үйінде өткен «Ауылға сағыныш» атты сазды бағдарламаның ұйымдастырушысы әрі көркемдік жетекшісі, ҚР Білім беру саласының озаты Болатхан Игіліковтей азамат болды. Осы күні ақын, сазгер, «Ұзынбұлағым», «Жырларым жүрегімнің жаухары» атты жыр жинақтарының авторы Медетхан Игіліков, әнші, ҚР Мәдениет саласының үздігі Бектұр Мұқаметалиев, дарынды әнші, эстрада жұлдызы Айбек Бектұрұлы, дәстүрлі әнші Алдаберген Қонысбайұлы, дарынды әншілер, концерттік бағдарламаның жүргізушілері Қаршыға Лебайқызы мен Алиайдар Болысұлы, дарынды әншілер Жазира Омарқызы, Қайрулла Бәзілұлы, Ғалия және Сымбат Маратқыздары, баянист, ұлағатты ұстаз, мәдениет саласының майталманы Серік Оразбекұлы Ұзынбұлақ ауылының жұлдыз жамыраған түнін әсем әнге, күміс күйге, тамаша сазға бөлеп тастады. Сөйтіп, үлкен-кішісі қалмай жиналған ауылдастарының ыстық ықыласына, алғысына бөленді. Ұзынбұлақ ауылдық округінің әкімі Олжас Тақабаев туған елі-жері үшін осындай сазды бағдарлама әзірлеп келіп, жерлестерін желпінтіп тастаған өнерлі жерлестеріне ауылдық округ атынан үлкен алғысын айтты. Кеген аудандық ішкі саясат, мәдениет, тілдерді дамыту және спорт бөлімінің басшысы Еркінбек Қалқаев өнерді ту еткен, соған мәнді ғұмырларын арнап келе жатқан бір топ өнер иелеріне Кеген ауданы әкімінің міндетін атқарушы Кеңес Қабылбековтың Алғыс хаттарын тапсырып, шығармашылық табыстар тіледі. Ал, осынау сазды бағдарламаны әзірлеп келгендерге үлкен қолдаушылықтарын көрсеткен осы ауылдың перзенттері, кәсіпкерлер Жаңылсын Шайыхсланқызына, Жандос Нүсіпәліұлына алғыстан басқа айтарымыз жоқ.
Қанат БІРЖАНСАЛ.
Ұзынбұлақ ауылы, Кеген ауданы.