Жуырда Қарасай ауданының құрылғанына 90 жыл толады. Осыған орай оның алғашқы мерейтойлық іс-шарасы да өткізілді. Ол «Қазыналы Қарасай» атты жазба ақындар мүшайрасы еді.
Жалпы, мүшәйраға жер-жерден 63 шығарма келіп түскен екен. Солардың ішінен қазылар алқасы он жеңімпазды анықтады. Сонымен Тәуелсіз елдің ақындары Қарасай ауданының табыс-жетістіктерін жырлаған, Қарасай батыр мен шапырашты Наурызбай бабаның ерлік істерін, өрлік іс-қимылын өлеңмен өрген, іштеріннен батырлық дастан да жазғаны кездесті. Осынау жыр додасына батыл араласқан ақындардың өнерін Қазақстан Ғылым Академиясының академигі, филология ғылымдарының докторы, Қазақстан Жазушылар одағы басқармасы төрағасының орынбасары, ақын Бауыржан Жақып, 2018 жылғы «Алтын тобылғы» байқауының бас жүлдегері, биылғы «100 жаңа есім» байқауының жеңімпазы, Қазақстан Жазушылар одағының мүшесі, ақын Мақпал Мыса, Қазақстан Жазушылар одағының мүшесі, ҚР ақпарат саласының үздігі, ақын Қуат Қайранбаев сарапқа салып қазылық етті.
Ілкі алдында ақындар аудан мерейтойына арнаған өз өлеңдерін оқыды. Ән мен жырға бөленген айтулы кеш тамаша қорытындыланып, жеңіс биігінен көрінген жеңімпаздар арнайы дипломмен және ақшалай сыйлықпен марапатталды.
Аталған дүбірлі додада тарихи толғаумен үздік көрінген Қазақстан Жазушылар одағының мүшесі, көптеген жыр мүшайраларының жеңімпазы, Алматы облыстық «Жетісу» газеті бас редакторының орынбасары Нүсіпбай Әбдірахым бас жүлдені жеңіп алғанын атап айтамыз!
Ал, бірінші орын жүлдесіне Қазақстан Журналистер одағының мүшесі, Жәркенттен келген ақын Құсайын Бейсебай ие болды.
Сонымен қатар, жүлделі екінші орынның еншісіне Қазақстан Жазушылар одағының мүшесі, Қазақстанның Құрметті журналисі, ҚР ақпарат саласының үздігі, Сарқан ауданының Құрметті азаматы Жомарт Игіман, белгілі айтыскер ақын, бірнеше жыр жинақтарын шығарған, Үмбетәлі Кәрібаев әдеби-мемориалды музейінің меңгерушісі, «ҚР үздік өлкетанушысы» төсбелгісінің иегері, халықаралық жыршы-термешілер мен айтыс ақындары одағының мүшесі Әуелбек Исқақов иеленді.
Сондай-ақ, кезекті үшінші дәрежелі дипломмен Қазақстан Жазушылар одағының мүшесі, көптеген жыр мүшайраларының жүлдегері, Қызылорды облысы, Қармақшы ауданынан келген құрметті қонақ Достық Тілеубергенов, Қарасай ауданының Құрметті азаматы, ақын Шекербек Садыханов, Қазақстан Жазушылар одағының мүшесі, көптеген жыр мүшайраларының жеңімпазы, Жамбыл аудандық газетінің журналисі Роза Сейілхан марапатталды.
Мүшәйраның ынталандыру сыйлығына Өзбекстан және Қарақалпақстан Жазушылар одағының мүшесі Әрепбай Халмұратов, Қазақстан Жазушылар одағының мүшесі, бірнеше жыр жинақтарының авторы, ақын әрі сазгер Жангелді Немеребай, Қазақстан журналистер одағының мүшесі, Жамбыл Жабаев атындағы ән байқауының жеңімпазы Шашубай Малдыбаев ие болды.
Мерей тойлық кеш барысында Қарасай ауданы әкімінің орынбасары Күлжан Дүйсенова өнегесі мол өлкенің рухын асқақтатқан ақындарға аудан әкімі Жандарбаек Далабаевтың ыстық сәлемі мен ізгі тілегін жеткізіп, қарасайлықтардың шынайы ризашылығын білдірді.
Ал, мүшайраның бас жүлде иегері Нүсіпбай Додабайұлын құрметпен алдағы уақытта өтетін ауданның мерейтойлық конференциясына шақырды.
Болашақта аталған байқауға жіберілген барлық шығармалар жеке жинақ боп шығатын болады.
Б. ЕЛЕУСІЗ.