Президентінің жанындағы Мемлекеттік басқару академиясы оқуға шақырады

Бүгінгі мемлекеттік қызмет заманауи өзгерістерге толы. Өткенде ғана жаңалықтардан мемқызметкерлерге ChatGPT қосымшасымен хат дайындауға тиым салынатындығы айтылды. Себебі мемлекеттік құпияны құрайтын ақпараттар мен персоналды мәліметтер интернет айдынына шығып кетуі мүмкін. Цифрлық қоғамның пайдасымен бірге осындай тәуекелдері де жоқ емес. Ал апта ішінде Парламент Мәжілісі «Жасанды интеллект туралы» заң жобасын бірінші оқылымда-ақ қабылдады. Айтпақшы заң жобасын мемлекеттік тілде депутат Екатерина Смышляева таныстырған.

Мемлекеттік қызметкерлер көп жерде жалақының төмендігін алдыға кесе-көлденең тартады. Білесіз бе, Қазақстандағы кез келген еңбекақы елдің экономикасына тәуелді. Ешкім қасақана жалақыны төмендетумен айналыспайтыны анық. Жалпы ұлттық өнім мықты болса – жалақы да жоғары болады. Ол тек мемлекттік қызметке ғана емес, бар салаға қатысты басы ашық сұрақ. Сондықтан еңбекақының көтерілгенін күтіп жүре бермей, тұлғалық дамуға назар аударған жөн. Бұл стратегиялық тұрғыдан ұтымды шешім болушы еді.

Жалпы мемлекеттік қызметте өсудің, сөйтіп әлеуметтік мәртебеңді де жақсартудың негізгі жолы – академиялық біліміңді жоғарылату. Қәзір осы саясатқа заңнамалық тұрғыдан басымдық берілуде. Меніңше бұл өте дұрыс шешім.

Грантқа түсіп кетсеңіз мемлекет сізді тегін оқытады. Еңбекақыңыз сақталып, стипендия түрінде төленеді. Екі жыл магистратураға не үш жылдық докторантураға түс те, өзіңе академиялық демалыс жарияла. Тәжірибеде жинақталып қалған мәселелерді ғылыми теорияларға салып тексеріп шық, шешу жолдарын іздестір, сосын өңіріңізге апарып өндіріске енгіз. Ел басқару ісіне жаңа оймен, тың көзқараспен атсалыс.

2025 жылдың 1 сәуірінен бастап Қазақстан Республикасы Президентінің жанындағы Мемлекеттік басқару академиясына құжаттарды қабылдау басталды. Өтініштер «Admission» ақпараттық жүйесі арқылы онлайн форматта қабылданады. Құжат тапсыру 2025 жылдың 25 маусымына дейін жалғасады.

Академия 12 білім беру бағдарламасы бойынша оқуға қабылдайды, олардың ішінде 9-ы – магистратура, 3-і – докторантура бағдарламалары.

Магистратура бағдарламалары: «MPA – Мемлекеттік басқару», «MPP – Мемлекеттік саясат», «MIR – Халықаралық қатынастар», «ME – Экономика», «MRD – Өңірлік даму», «MHRM – Адами ресурстарды басқару», «MDPA – Цифрлық мемлекеттік басқару», «EMPA – Мемлекеттік басқару» (модульдік оқыту негізінде), «MRDm – Өңірлік даму» (модульдік оқыту негізінде).

Докторантура бағдарламалары: «DPA – Мемлекеттік басқару», «DE – Экономика», «DIR – Халықаралық қатынастар».

Биыл да магистратураға 120, докторантураға 12 мемлекеттік грант бөлінді.

2025 жылғы қабылдау науқанының басты жаңалықтары мен өзгерістері:

1. «Цифрлық мемлекеттік басқару» жаңа бағдарламасы іске қосылды.

Жаңа MDPA магистратура бағдарламасы цифрлық трансформацияны басқару, мемлекеттік секторда цифрлық шешімдер әзірлеу мен енгізу және ақпараттық қауіпсіздікті қамтамасыз ету саласындағы мамандарды даярлауға бағытталған. Бір жылдық бағдарламаға цифрлық даму саласында жұмыс істейтін және бейінді жоғары білімі бар, кемінде 3 жыл мемлекеттік қызмет өтілі бар үміткерлер қатыса алады.

2. Мемлекеттік қызмет өтіліне қойылатын талаптар артты.

Барлық магистратура бағдарламаларына қабылдану үшін мемлекеттік қызмет өтілі 2 жылдан 3 жылға дейін ұзартылды.

«MPA – Мемлекеттік басқару» бағдарламасына – кемінде 5 жыл,

«MPP – Мемлекеттік саясат» бағдарламасына – кемінде 4 жыл еңбек өтілі талап етіледі.

3. Ақылы негізде оқуға түсу талаптары нақтыланды.

Енді ақылы бөлімде тек мемлекеттік қызметшілер ғана емес, сондай-ақ мемлекеттік бюджет есебінен қаржыландырылатын мемлекеттік органдардың ведомстволық бағынысты ұйымдарының және квазимемлекеттік сектор субъектілерінің өкілдері де оқи алады.

4. Білім беру бағдарламаларына ерекше талаптар енгізілді.

Әрбір бағдарламаға саласына қатысты нақты талаптар белгіленді. Бұл өзгерістер магистратура мен докторантура бағдарламаларына үміткерлерді сапалы іріктеу мақсатында енгізілді.

Үміткерлер келесі құжаттарды тапсыруы қажет:

1. Мемлекеттік органның жолдамасы (тек мемлекеттік қызметшілер үшін). Мемлекеттік грантқа үміткерлер жолдаманы мемлекеттік органның басшысы немесе аппарат басшысының қолымен ұсынуы тиіс.
2. Жеке куәліктің электрондық көшірмесі.
3. Жоғары білім туралы диплом мен қосымшасының скан нұсқасы (магистратураға) немесе жоғары оқу орнынан кейінгі білім туралы диплом мен қосымшасының көшірмесі (докторантураға).
4. Мемлекеттік тілді меңгеру деңгейін растайтын В1 деңгейінен төмен емес QAZAQ RESMI TEST немесе ҚАЗТЕСТ сертификаты (шетел азаматтарынан басқа). QAZAQ RESMI TEST – Академия базасында әзірленген және кез келген өңірде онлайн форматта тапсыруға болады.
5. MPA, MIR магистратура бағдарламаларына және докторантураға бір халықаралық сертификат (IELTS, TOEFL IBT, TOEFL ITP немесе TOEIC).
6. Мемлекеттік қызметшілер үшін – қызметтік тізім; басқа үміткерлер үшін – еңбек қызметін растайтын құжат.
7. Докторантураға түсетіндер үшін – ғылыми-зерттеу жоспары (Research proposal), ол жеке бағаланады.
8. Электрондық цифрлық қолтаңбамен расталған өтініш.

Іріктеу кезеңдері:

• Алғашқы кезең – онлайн форматта аналитикалық эссе жазу (28 маусым – 1 шілде).

Докторантура бағдарламасына үміткерлер үшін қосымша зерттеу жоспары (Research proposal) бағаланады.

• Екінші кезең – офлайн сұхбат (8–23 шілде), Академия ғимаратында өтеді.
• Аралық нәтижелер 25 шілдеде жарияланады. Құжаттарды рәсімдеу және келісімшартқа отыру мерзімі – 7 тамызға дейін.

Оқу процесі дәстүрлі түрде 1 қыркүйекте басталады.

Академияның артықшылықтарын атап өтер болсам:

– тәжірибеге негізделген оқу процесі

– кәсіби және тұлғалық даму

– мемлекеттік қызметші жалақысы көлемінде стипендия

– шетелдік тағылымдама

– ғылыми зерттеулер мен жобаларды қорғау

– тәжірибелі профессорлар мен сарапшылардан дәріс алу

– «Жас мемлекеттік қызметшілер үйінде» тұру мүмкіндігі

– пайдалы нетворкинг пен қауымдастықтың бір бөлігі болу.

Қабылдау ережелері туралы толық ақпарат Академияның ресми сайтында – apa.kz, сондай-ақ әлеуметтік желідегі ресми парақшаларында жарияланған. Қосымша ақпаратты Қабылдау комиссиясынан немесе Академия филиалдарынан алуға болады.

Академия – бұл мемлекеттік басқару жүйесінің тиімді дамуына үлес қосқысы келетін, кәсіби біліктілігін арттыруға ұмтылатын мамандар үшін бірегей алаң.