Қоқыс шығарудың жаңа тарифы бекітілді

Қарасай ауданының мәслихаты тұрмыстық қатты қалдықтарды жинау, шығару, өңдеу және сақтау тарифін бекітті. Айта кетейік, бұған дейін ауданда қоқыс шығару және өндеу секілді жұмыстар бойынша шекті тарифына соңғы 8 жылда ешқандай өзгерістер енгізілмеген.

Күні кеше аудандық әкімдікте VIII шақырылған аудандық мәслихаттың кезекті 35-ші сессиясы өтті. Аудандық мәслихат төрағасы Бауыржан Айнабеков жүргізген жиынға аудан әкімінің орынбасары Рустам Атшабаров, мәслихат депутаттары, ауылдық округтердің әкімдері, бірқатар бөлім басшылары қатысты.
Сессияның күн тәртібінде 8 мәселе қаралды. Алдымен Қарасай ауданының 2024 жылға арналған аудан, қала және ауылдық округтері бюджеттерінің атқарылуы туралы Алматы облысы бойынша Тексеру комиссиясының мүшесі Қуаныш Бекмұратұлы баяндама жасап, жиналғандарды бір жылдық есеппен таныстырды. Оның айтуынша, 2024 жылы Қарасай ауданында экономиканың өсуіне тікелей әсер ететін өнеркәсіппен ауылшаруашылығы салаларында өндіріс қарқыны жоғарылап, құрылыс жұмыстары артқан, шағын және орта бизнес шығаратын тауарлардың көлемі өскен. Ауданда 245,6 мың шаршы метрі іске қосылған. Назарға алатын мәселе – бағасы қымбаттаған әлеуметтік тауарлар. Алдағы уақытта оны ретке келтіру қажет. Баяндаманы тыңдаған қарасайлық халық қалаулыларының тарапынан бюджеттің бөлінуі, қажетті конкурстардың өткізілу уақыты секілді бірқатар мәселелер бойынша сұрақтар қойылып, тиісті жауаптар алынды.
Сондай-ақ бұл сессияда ауданға қарасты Жібек жолы ауылдық округі, Жібек жолы ауылында орналасқан атауы қайталанған көшелердің атауын өзгерту және жаңа көшелерге атау беру мәселесі бойынша аудандық мәдениет, тілдерді дамыту, дене шынықтыру және спорт бөлімінің басшысы Күлжан Дүйсенова баяндама оқып, ағымдағы жылы атаулары өзгеретін көшелер жайында айтып өтті. Бұл деректер назарға алынып, депутаттардың дауыс беруімен мақұлданды.
Күн тәртібіндегі кезекті мәселелер бойынша аудандық аумақтық сайлау комиссиясының төрайымы Ғалия Аманова сөз сөйлеп, Қарасай ауданы бойынша жаңадан құрылған учаскелік сайлау комиссияларының сандық құрамы және де аудандағы учаскелік сайлау комиссияларының құрамына өзгерістер енгізу жайында түсінік берді. Оның тарапынан жеткізілген ақпараттарды депутаттар қауымы дауысқа салу арқылы оң шешімін шығарды.
Қарасай ауданының «Құрметті азаматы» атағын беру мәселе бойынша аудандық мәслихат төрағасы Бауыржан Айнабековтың өзі сөйлеп, жиналған халық қалаулыларын аталған атаққа ұсынылған кәсіби спорт шебері, еркін күрестен ҚР еңбегі сіңген спорт жаттықтырушысы Альменбаев Ерубай Тілеужанұлы мен «Алатау Жарық Компаниясы» АҚ басқармасының төрағасы Асылов Абай Ноғайұлының өмірі мен еңбек жолымен таныстырып өтті. Екі үміткерге атақ беру мәселесі депутаттар тарапынан қолдау тапты.
Негізгі күн тәртібіндегі тағы бір мәселе бойынша Қарасай ауданы әкімдігі жанындағы терроризмге қарсы комиссияның дербес құрамы туралы мәселе бойынша мәслихат депутаттарының дауыс беруі арқылы шешім бірауыздан бекітілді.
Сессия отырысында қосалқы сегізінші мәселе болып депутат, «Atlant Media» ЖШС-нің директоры Атлана Исаева тарапынан ұсыныс ретінде айтылған қатты тұрмыстық қалдықтарды жинақтау, тасымалдау және көму бойынша халыққа арналған тарифті бекіту қарастырылды. Жаңа жоба арнайы комиссия отырысында кеңінен талқыланған.
Жобаны жасап, жиында таныстырған компания өкілінің мәлімдеуінше, жаңа тарифті есептеу жүйесі ҚР Экология және табиғи ресурстар министрлігінің бекіткен методикасы арқылы жасалған. Нақты бағаны шығару үшін мамандар қоқысты шығарумен айналысатын 12 ірі мекеме иесімен кездескен.
Есептеулер бойынша Қарасай ауданында көркейтілген сектордағы тұрғындар үшін тариф бір адам басына шамамен – 545, 37 теңге (қоқысты жинау және тасымалдау – 361 теңге, өндеу – 69 теңге, көму – 115 теңге), ал көркейтілмеген секторда – 586,64 теңге, бірлік үшін тариф – 3 537,52 теңге болуы мүмкін. Бұл – шекті тариф. Яғни компаниялар алдағы бірнеше жылда қоқыс жинау құнын жоғарыда көрсетілген соммадан артық көтере алмайды.
Маманның айтуынша, жоғарылатылған тарифтен түсетін қаражаттың басым бөлігі жұмысшылардың жалақысын көтеруге және осы саланың материалдық-техникалық базасын жақсартуға бағытталатын болады. Сондай-ақ біркелкі тариф бекітілген соң Алматы облысы Қарасай ауданының 2024-2028 жылдарға арналған коммуналдық қалдықтарды басқару бағдарламасына сәйкес қоқыспен айналысатын компанияларға қойылатын жаңа талаптар қарастырылып, бекітіледі. Оның арқасында конкурстан тек талапқа сәйкес мекемелер ғана өтетін болады. Жаңа жобаның екінші бөлігі келесі мәслихат сессиясында қарастырылады.
Халық қалаулылары арасында біраз дау туғызып, түрлі пікірлердің айтылуына себеп болған мәселе біраз талқыға салынып, жиын соңында депутаттардың көпшілігінің қолдауымен бекітілді.
Сессия отырысын тәмамдаған аудан әкімінің орынбасары Рустам Әмірғалиұлы жиында біраз маңызды мәселенің қамтылғанына тоқталып, халық қалаулыларына алғысын білдірді. Сондай-ақ аудандағы өзекті қоқыс мәселесі алдағы уақытта назарда болатынын жеткізді.

Ақтоты МЫРЗАБЕКҚЫЗЫ.