Қоғамдық көліктің жолақысы қымбаттады

Қарасай ауданында қоғамдық көлікте жүрудің жол ақысы қымбаттайды. Енді картамен төлем жасайтындар 120 теңге, ал қолма-қол есеп айырысатын жолаушылар 200 теңге төлеуі тиіс. Жаңадан бекітілген тариф маусым айының 26-сы күні қолданысқа енгізілді. Жаңа тариф мердігер компанияның шығынын өтеуге бағытталады.

Айта кетейік, кейінгі екі жылда өңірде қоғамдық көлік мәселесі қолға алынып, жүйелі жұмыстар жүргізілген еді. Соның нәтижесінде бүгінгі таңда аудан аумағында жеті маршрут бойынша 40-қа жуық қоғамдық көлік қызмет көрсетуде. Олардың жұмысына «Дтранс» ЖШС және «Алматы облысының жолаушыларды тасымалдау компаниясы» ЖШС жауапты. 2024 жылы «Дтранс» ЖШС 10 жаңа қоғамдық көлікті іске қосса, ағымдағы жылы «Алматы облысының жолаушыларды тасымалдау компаниясы» ЖШС тарапынан 17 жаңа қоғамдық көлік сатып алынған болатын.
Нәтижесінде, жеті маршруттың бесеуі толықтай жаңартылды. Қалған екеуінде жаңарту жұмыстары субсидиялау қаржысына сәйкес кезең-кезеңімен жүзеге асырылады.
Жоғарыда аталған жеті ауданішілік маршруттан бөлек қосалқы Алматы қаласының мобильдік басқармасы ұйымдастырған 29 маршруттың 14-і іске қосылған. Осыған сәйкес, бүгінде ауданға қарасты 47 ауылға автобустар ұйымдастырылған.
Таяуда ауданішілік қоғамдық көліктер бойынша өзгерістер енгізілді. Яғни жол жүру тарифтері, ҚР «Автомобиль көлігі туралы» Заңының 19-бабының 2-1 тармағы негізінде әзірленген, Қарасай ауданы әкімдігінің 30 мамырдағы №6237-05 қаулысы белгіленді. Аталған нормативтік-құқықтық актінің әзірлену барысында еліміздегі экономикалық және аудан тұрғындарының әлеуметтік жағдайлары ескерілді.
Қаулыға сәйкес, 26 маусымнан бастап Қарасай ауданы аумағындағы әлеуметтік мәні бар, №1 Қаскелең қаланың ішіндегі «Сәукеле – Теремки», №2А «Қаскелең автобекеті – Қайрат ауылы, №9 «Исаев – Қаскелең», №3 «Әйтей – Қаскелең», №5 «Қаскелең – Жандосов – Бекболат ауылы», №6 «Тұрар – Алтын Орда», №7 «Батан – Алтын Орда» маршруттарында жол ақысы көтерілді.
Нақты айтқанда жол жүру құны келесідей болып өзгертілді:
1.Электронды төлеу жүйесі, мобильді қосымша арқылы, көлік карталары немесе екінші деңгейдегі банк карталары арқылы тасымалдау құны: ересектерге – 120 теңге, ал 7 жастан 18 жасқа дейінгі балалар мен жасөспірімдерге – 60 теңге;
2.Жол ақысын қолма-қол ақшамен төлеу кезінде: ересектерге – 200 теңге, ал 7 жастан 18 жасқа дейінгі балалар мен жасөспірімдерге – 100 теңге.

Ақтоты
МЫРЗАБЕКҚЫЗЫ