Қоғам қауіпсіздігіне жауапты тәртіп сақшысы

Қызығынан қиындығы көп саламен біте қайнасып жүргендердің тірлігі қашанда қарбаласқа толы, үнемі қауырт жүреді. Сондықтан болар асқан қырағылық пен табандылықты, сақтықты талап ететін бұл қызметтің жауапкершілік жүгін арқалау оңай емес. Десе де аталған мамандыққа аса сүйіспеншілікпен қарап, оның жүктейтін міндетін абыроймен атқарып жүрген азаматтар аз емес. Солардың ішінен қазіргі уақытта Қарасай ауданы тұрғындарының қауіпсіздігін қамтамасыз ету жолында тынбай еңбек етіп жүрген Ерлан Бекебаевты ерекше атап өтуге болады.
Өзінің қарапайымдылығына қарамастан полиция майоры өз ісіне деген адалдық пен жауапкершілігінің арқасында әріптестері арасында жоғары беделге ие. Ал басшылығы оны кәсіби маман ретінде жоғары бағалайды. Еңбек жолын халықпен тығыз жұмыс істейтін учаскелік полиция инспекторы ретінде бастаған Ерлан Асқарұлы қазіргі таңда Қарасай аудандық полиция басқармасының жергілікті Полиция бөлімін басқарып отыр. Алдымызда келе жатқан полиция қызметкерлері күні қарсаңында маңызды қызметті абыроймен атқарып жүрген осы азамат жайлы әңгіме өрбітбекпіз.

Бірақ алдымен кейіпкеріміздің өмір жолын жазуды бастамас бұрын оны бүгінгі төл мерекесі, 35 жасқа толуымен құттықтағымыз келіп отыр. Ерлан Бекебаев жаңа жасыңыз тек жақсылығын сыйласын. Деніңізге саулық, отбасыңызға амандық, жұмысыңызға сәттілік тілейміз!
Мақаламыздың кейіпкері Қазақстанның оңтүстігінде орналасқан Жамбыл облысының Шу ауданында дүниеге келген. Алайда ол жастық шағын Тұрар Рысқұлов ауданындағы Луговое ауылында өткізген. Орта білімді аудандағы Қызылшаруа ауылының орта мектебінде алған. Жасөспірім кезінде спортқа қызығып, дзюдо және самбомен айналыса бастаған. Оқу оқып жүріп, әртүрлі жарыстарға қатысып, облыс намысын абыроймен қорғаған. Тіпті, мектепті аяқтаған соң Ерлан толығымен спортқа кетуді де ойлаған. Алайда ұлының жоғарғы оқу орнына түсіп, болашақта жақсы жұмыс орнына орналасуын қалаған анасы Бәтима әпкеміз оның бұл ойын құптамаған. Ата-анасының үмітін ақтап, олардың арқасүйері, артынан ерген інісі Дәурен мен қарындасы Жансаяға жақсы үлгі болғысы келген ол уақыт өте келе анасының сөзіне құлақ асып, 2008 жылы Тараз қаласында орналасқан Тараз мемлекеттік университетінің «Құқықтану» мамандығына оқуға түскен. Алайда, тіпті университет қабырғасында жүріп те спортты тастамай, құрама командамен бірге түрлі жарыстарға қатысып, Жамбыл облысының атын қорғады. Ағасының қызығушылығын көрген інісі Дәурен де спортқа бет бұрып, бокспен айналысқан. Ағасы секілді ол да жақсы жетістіктерге қол жеткізіп, ҚР чемпионы, халықаралық дәрежедегі спорт шебері атанды.
Санасында сәуле бар, келешегіне үлкен талпыныспен қараған жас жігіт, оқуын ойдағыдай тәмамдап, қолына дипломын алған соң, 2013 жылы Қарасай ауданының ішкі істер бөліміне (бүгінде аудандық полиция басқармасы) жұмысқа орналасқан. Алғашқы жылы Қаскелең қаласы бойынша учаскелік полиция инспекторы болып еңбек етті.
– Тәртіп сақшылары қатарына қосылу мен үшін кездейсоқ таңдау болмады. Жастайымнан ержүрек, адал, тәртіпті болуды мақсат тұтып, осы қызмет туралы армандадым. Сол кездердің өзінде мен бұл сала үлкен абырой ғана емес, ең алдымен өзіңнің, жақындарыңның, әріптестерің мен халық алдындағы жауапкершілік екенін жақсы түсінген едім. Осы жерде таңдаған жолымнан таймай, арманымнан бас тартпауға үгіттеп, үш жерде жұмыс істеп жүріп, оқуға түсірген анама үлкен алғысымды білдіремін. Ол кісі болмағанда бүгіндегі өмірім қалай болатынын кім білер.
Қазіргі таңда арманыма қол жеткізіп, әріптестеріммен бірге аудан тыныштығына жауапты болып жүргеніме қуанамын. Әрине, жұмысым оңай емес, кейде түрлі қауіп-қатермен бетпе-бет келесің. Десе де еш өкініш жоқ, – деді полиция майоры.
Ерлан 2014 жылдан бастап 2015 жылға дейін ауданға қарасты Әйтей ауылдық округінде аға учаскелік полиция қызметкері, 2016 жылдан 2022 жылға дейін Ұмтыл ауылдық округінде жұмысты ұйымдастырушы, аға учаскелік полиция қызметкері болып жұмыс істеді. Одан кейін 2022 жылы жергілікті полиция қызметі (ЖПҚ) бастығының міндетін атқарушы және де сол жылдың 17 қарашасынан бастап қазіргі уақытқа дейін ЖПҚ бастығы қызметін атқарып келеді.
Он жылдан артық күн сайын күрделі де барынша тынымсыз жұмысты істеп жүрген кейіпкеріміз үнемі белсенді қозғалыс үстінде. Оның айтуынша, бұл саланы таңдағандардың бойында жауапкершілік, тиянақтылық пен тәртіптен бөлек адалдық, күнделікті кездесетін азаматтармен адамдық қатынас жасау, ұрымтал сәттерде тиімді де дұрыс жол таба білу, қай кезде де жан-жақты сараланған, сарапталған шешім шығара білу сияқты өзге де қасиеттерді иегере білуі керек. Өйткені полиция жұмысында асығыс шешім қабылдауға жол беруге болмайды. Расымен де, тәуекелге толы салада ешқандай қателікке жол жоқ.
Қызметінің алғашқы жылдары Ерланның есінде қалған сәттерінің бірі – 2016 жылы Қаскелең қаласында орын алған оқиға.
Ашып айтқанда, 2016 жылдың 11 ақпанында кейіпкеріміз Қаскелең қаласындағы көпқабатты үйлердің бірінде кезекшілікте жүрген. Тұрғын үйдің подъезін аралап, баспалдақтан төмен түсіп бара жатқанда, есіктердің бірінің қасында үш азаматтың сыбырласып тұрғанын байқаған. Бір мезетте олар форма киген полиция қызметкерін көріп, ойланбастан баспалдақпен төмен қарай жүгіре жөнелген. Ерлан оларды тек далада қуып жетіп, ұстаған. Күдіктілер өздерін мемлекеттік орган қызметкерлері ретінде таныстырған. Алайда оның сенбегенін түсінген соң, үшеуінің біреуі қалтасынан пышақ алып шығып, қорқыта бастады. Ал екіншісі такси тоқтатып, қашып кетпекші болған. Бірақ полиция қызметкері олардың алдына шығып, жолын кеседі. Сол сәтте пышақпен шабуыл жасайын деген азаматты жастайынан айналысқан самбо мен дзюдо әдістерін қолданып, залалсыздандырады. Ал көмекке келген екіншісін тоқтатуға жақын маңдағы дүкеннің сатушысы көмектеседі. Алайда осы сәтте үшінші күдікті қашып үлгерген. Кейіннен оны құқық қорғау органдары Алматы қаласында ұстаған. Тергеу барысында үшеуі де ұрлықпен күн көріп келген қылмыстық топтың мүшелері екені анықталған. Мұны олардан тәркіленген заттай айғақтар растады. Осы оқиғаға қарап, кейіпкеріміздің, шын мәнінде, қызығынан гөрі қиындығы көбірек полиция саласын қалап таңдап, нақты өз орнын тапқан маман екенін түсінуге болады. Сондай-ақ, бұл Ерланның жұмыста жинақтаған тәжірибесі ғана емес, бойына біткен батылдығы мен жастайынан меңгерген дзюдо және самбо әдіс-тәсілдерін білгені босқа кетпей, қажет кезде оған көмек болғанының дәлелі.
Қазіргі таңда жергілікті полиция бөлімін басқарып отырған Ерлан Асқарұлының қол астында 176 қызметкер бар. Олардың қатарында жасөспірімдермен жұмыс істейтін ювеналды полиция, әйелдерді зорлық-зомбылықтан қорғау тобы, жол-патрульдік полиция ротасы, қоршаған ортаны қорғау тобы және де ауданға қарасты Қаскелең қаласы мен барлық ауылдық округтерде тәртіпті сақтайтын учаскелік полиция испекторлары бар.
– Жалпы полиция қызметінің кез келген бағыты қиын. Өйткені бүгінде адамдардың құндылықтар мен өмірге деген көзқарастары қатты өзгерген. Әсіресе, бұл жасөспірімдерге байланысты. Қазір олардың көбі ата-анасын, мектептегі ұстаздарын тыңдамай өз қалағанын жасайды. Заң, тәртіп деген нәрселерге назар аудармайды. Сонымен қатар балаларын өз-өздеріне тапсырып, «жоқ», «болмайды» деген сөздерді дұрыс айта алмайтын ата-аналар да көбейген. Бұл онсызда оңай емес жұмысымызды қиындата түсті.
Әрине, осы ретте біз өз тарапымыздан жұмыс істеу тәсілдерін жетілдіріп, басқа жолдарды табуға тырысамыз.
Бірақ бірнәрсе өзгеріссіз қалады. Біз өз қызметімізді «Құқықтық тәртіп» қағидатын негізге ала отырып, міндеттерімізді адал әрі әділ атқарамыз, – деді ол.
Көп жылдық қызметі барысында тапқырлық пен талғампаздықтың арқасында Ерлан өзін жан-жақты сауатты, кәсіби білігі мол, жауапты маман ретінде таныта білді. Оның бұл қасиеттері басшылық алдында да еленіп, талай рет мақтау мен марапаттарға ие болған.
Ерлан Бекебаевтың жеке өміріне келетін болсақ, ол өзінің студенттік шағы өткен Тараз қаласында Таңшолпан есімді арумен танысып, 2012 жылы шаңырақ көтерді. Бүгінде екеуі – Іңкәр, Аяла, Раяна, Мәриам есімді сүйкімді төрт қызды тәрбиелеп отырған көп балалы ата-ана. Қыздарының үшеуі мектеп оқушысы болса, біреуі әлі кішкентай.
Қазіргі таңда Бекебаевтар отбасы Қаскелең қаласында тұрады. Олар үшін үлкен бақыт – оның отбасының маңызды мүшесіне айналған Ерланның ата-анасы болды. Сөйтіп, бір шаңырақ астына үш ұрпақтың өкілдері жиналған. Ал ағаларын мақтан тұтатын Дәурен мен Жансая – өз өмірлерін құрып, бүгінде жеке іспен айналысып жүрген жас кәсіпкерлер.
– Білесіз бе, мен үйде көп болмаймын, – деді әңгіме барысында Ерлан Асқарұлы. – Оған біз ештеңе істей алмаймыз, бұл біздің жұмысымыз. Түнгі рейдтерге жиі қатысуға тура келеді. Ал демалыс күндері қоңыраулар, сапарлар болады. Бірақ менің отбасым түсіністікпен қарап, әрдайым қолдауларын көрсетеді. Бүгінде олар – менің сенімді арқасүйерлерім.
Қанша жыл өтсе де міндетімді абыроймен адал атқарып, ел игілігі үшін қалтқысыз қызмет ету деген негізгі мақсатым өзгерген жоқ. Әрине, өзгелер секілді мен де жұмысымда жақсы жетістіктерге қол жеткізіп, биік шыңдарды бағындырғым келеді. Десе де халыққа қызмет көрсету мен үшін бірінші орында, – деді полиция майоры.
Сөз соңында балалық арманы орындалып, бірталай жетістіктерге жеткен Ерлан Асқарұлы қызметінде талай нәрсені үйреніп, талай жақсы адамдарды кездестіргенін айта отырып, осы жолда оған қолдау көрсеткен барлық әріптестері мен басшылығына алғысын айтып, келе жатқан кәсіби мерекелерімен құттықтады. Сондай-ақ түрлі тәуекелге толы саланы таңдап, оның жүктеген міндетін абыройлы арқалап жүргендердің отбасылары аман, жұмыстары табысты болуын тіледі.
Біз де өз кезегімізде батыл полиция майорын келіп жеткен туған күнімен және де кәсіби мерекесімен құттықтаймыз! Әрқашан абырой биігінен түспей, елдің алғысын арқалап жүре беруін тілейміз!

Ақтоты
МЫРЗАБЕКҚЫЗЫ