Ауданымызда спортшы жастардың қатары артумен қатар, олардың жеткен жетістіктері де көпшілікті тәнті етуде. Сондай мақтаныштардың қатарында ағайынды Бауыржан және Талғат Баймұхамбетовтер жаттықтыратын Жамбыл орта мектебінің оқушысы Диана Пивцова да бар. Муай-тай спортын серік еткен жас аруымыз жақында Алматы қаласында өткен Қазақстан Республикасының кубогында бақ сынап, чемпиондық атаққа қол жеткізді. Оның бұл жетістігі байрақты бәсекеде шыңдалуына нағыз мүмкіндік деуге болады. Анығын айтқанда, Д.Пивцова ағымдағы жылдың қыркүйек айында Татарстанның Казан қаласында өтетін ТМД арасындағы жастар ойынына жолдама алды. Спортшы қыздың чемпион атануымен өзі білім алатын Жамбыл орта мектебінің директоры Дархан Нақысбеков арнайы құттықтап, алдағы жарыстарына сәттілік тіледі.
Чемпион Диана бақ сынаған бұл жарыста С.Жандосов атындағы кәсіптік-техникалық колледждің 3 курс студенті Әділ Алтынбектің де бағы жанды десек болады. Ол өзінің білек күшінің арқасында үздіктердің қатарынан көрініп, жүлделі ІІІ орынды қанжығасына байлады.
Муай-тай спортын еркін меңгерген қос спортшы қазіргі таңда №2 Балалар мен жасөспірімдер спорт мектебінде өз шеберліктерін шыңдап, осы орталықтың намысын қорғау үшін алдағы болатын жарыстарға қызу дайындық үстінде. Аталмыш спорт кешенінің басшысы Бекжан Джолшибеков жақында қарасайлық спортшылардың жеткен жеңістерімен де құттықтап, спорттық жолдағы мансаптарына ақ тілегін білдірді.
Осындай үздік шәкірттерін шыңдап жүрген ағайынды Бауыржан және Талғат Баймұхамбетовтер спортшылардың жеңісті жолда жарқырауына аудандық Денешынықтыру және спорт бөлімінің де қосқан үлесі зор екендіктерін айтады. Оның ішінде басшысы С.Қамзанов пен спорт маманы Н.Жұмановтың жарыс аясында көрсеткен қолдауларына ризашылықтарын білдіруде. Сонымен қатар, тәлімгерлер С.Жандосов атындағы атындағы кәсіп-техникалық колледжінің директоры Р.Бакиров, №2 Балалар мен жасөспірімдер спорт мектебінің басшысы Б.Джолшибеков және Жамбыл орта мектебінің директоры Д.Нақысбековке ерекше алғыстарын жеткізуде. Олардың айтуынша, осындай басшылықтың ықпалымен спортшы жас қарасайлықтар түрлі додаларда емін-еркін бақтарын сынап, кіл мықтылардың арасынан табылуда.
Д. МУХАМАДИЕВ.