Мереке қарсаңында баспана бақытына бөленді

Биыл барша арманымыздың асқары, бақытымыздың бастауы болған ұлық мереке Тәуелсіздік күніне 33 жыл толып отыр. Оның қарсаңында Қарасай ауданының тұрғындары қуанышты сәттің, игілікті шараның куәсі болды. Осыдан бір апта бұрын салтанатты түрде 16 отбасыға коммуналдық жалға берілетін тұрғын үйдің кілті тарту етілді.

Аудандық әкімдіктің үлкен мәжіліс залында өткен шарада аудан басшысының орынбасары Рустам Атшабаров жиналған тұрғындарды келіп жеткен Тәуелсіздік мерекесімен құттықтап, әлеуметтік мәселелерге ауданымызда баса назар аударылып отырғанын айтып өтті.
– Елімізде халықтың басым көпшілігі үшін тұрғын үй – ең өзекті мәселе. Сондықтан да бүгінде Қарасай ауданында тұрғындарды баспанамен қамту – негізгі басымдықтың бірі. Осы бағытта өңірде тындырымды тірліктер атқарылуда. Жыл басынан бері ауданымызда 32 отбасы баспаналы болса, бүгін міне, өздеріңіздің қатысуларыңызбен 16 отбасы қоныс тойын тойлайын деп отыр. Бұл – мемлекеттің тұрғындарды қолдауының нақты көрінісі, – деді аудан әкімінің орынбасары.
Мұнан кейін ол 16 отбасыға баспана кілтін тарту етіп, Тәуелсіздік мерекесімен және қоныс тойымен құттықтады. Қуаныш иелерінің қатарында жасына қарай зейнет демалысына шыққан зейнеткерлер, мүмкіндігі шектеулі жандар, мүмкіндігі шектеулі балалары бар немесе оларды тәрбиелеп отырғандар, толық емес отбасы санатындағылар болды. Жалға берілетін пәтерлер «Қарлығаш» ықшам ауданында орналасқан.
Көптен күткен үйді иеленген жандардың қуанышында шек болмады. Қонысқа ие болғандар бір-бірін құттықтап, аудан басшылығына жақсы тілектерін жаудырды. Соның бірі – Қаскелең қаласының тұрғыны, 9 баланың анасы 83 жастағы Сембиева Алтынкүл.
– Баспана кезегінде тұрғаныма 12 жыл болды. 42 жасымда жесір қалып, 9 баланы өз күшіммен өсірдім. Енді, міне үйлі болдым. Қолыма кілтті табыстағанда қуанышымда шек болмады. Мұндай жақсылықтың шарапатын қиналып жүрген әрбір отбасы көрсе деп тілеймін. Қол ұшын созып, көмектескен аудан әкіміне аналық алғысымды білдіремін, – деді көп балалы ана.
Пәтер кілтіне ие болған тағы бір қаскелеңдік, көп балалы ана Айнұр Смағұлова да шара барысында осы сәтті біраз жыл күткендігін айтып, ізгі тілегін білдірді.
– Көптен күткен пәтерімді алып, риза болып жатырмын. Көп балалы ана ретінде кезекте тұрып, 10 жылдан аса уақыт күттім. Міне, сол күнге де жеттік. Халықтың жағдайына ерекше көңіл бөліп жатқан аудан басшылығына ризашылығымды білдіремін. Осындай қуаныш үйге зәру азаматтарға жұғысты болсын, ұзағынан сүйіндірсін, – деді қаскелеңдік тұрғын.
Айта кетейік, жыл басынан бері ауданымызда көп балалы отбасылар мен халықтың әлеуметтік осал тобы өкілдеріне 72 пәтер берілген. Аудан әкімінің орынбасары Рустам Әмірғалиұлының мәлімдеуінше, ағымдағы жылдың соңына дейін тағы да пәтер кілттері табысталатын болады.
Ақтоты МЫРЗАБЕКҚЫЗЫ.