Ұлттық мұра мен мәденеи құндылық дәріптелді

Мәдениет пен өнер – ұлт руханиятының өзегі. Осы бағытта еңбек етіп жүрген жандардың кәсіби мерекесіне орай Қарасай ауданында ерекше іс-шара өтті.

21 мамыр – Мәдениет және өнер қызметкерлері күніне орай ҚР Тұңғыш Президентінің «Атамекен» тарихи-мәдени орталығында интерьерге арналған авторлық қуыршақтар көрмесі ашылды.

Қазақы нақышта жасалған бұл бұйымдар – Қарасай ауданында орналасқан Art Dolls шеберханасының қолөнер туындылары. Аталған шығармашылық кәсіпорында еңбек етіп жүрген шеберлер – Татьяна Фисенко мен Алиса Мендыгалиева. Олар 7 жылдан астам уақыт бойы ұлттық стильдегі қуыршақтар жасап келеді. Әр қуыршақтың бейнесінде халқымыздың салт-дәстүрі мен тарихи болмысы көрініс тапқан.

Көрменің ашылу рәсіміне «AMANAT» партиясы Қарасай аудандық филиалының төрағасы Қаныбек Айтжанов, сондай-ақ аудандық мәслихат депутаты Адиля Коржумбаева қатысып, қолөнершілерге шығармашылық табыс тіледі.

Іс-шара ҚР Тұңғыш Президентінің «Атамекен» тарихи-мәдени орталығының директоры, «AMANAT» партиясы жанындағы Miras аймақтық кеңесінің төрағасының орынбасары Садуақасова Аяужан Заманбекқызының бастамасымен ұйымдастырылды.

Мұндай шаралар ұлттық мұра мен мәдени құндылықтарды дәріптеуге, сондай-ақ отандық қолөнер шеберлеріне қолдау көрсетуге бағытталған.