Жаңа жылдың қарсаңында Қарасай ауданы әкімінің «Mall Aport» ойын-сауық сауда орталығында балаларға арналған жаңажылдық шырша мерекесі ұйымдастырылды.
Мерекелік кешке аудан әкімі Жасұлан Естенов арнайы қатысып, балалардың қуанышты сәтіне куә болды. Сондай-ақ аудан басшысы салтанатты шарада ата-аналарға, ұстаздарға және шараның басты қонақтары – бүлдіршіндірге жаңажылдық ақ тілегін білдірді.
– Құрметті ата-аналар және балалар! Сіздерді Жаңа жыл мерекесімен шын жүректен құттықтаймын! Отбасыларыңызға бақ-береке, шаттық тілеймін! Оқушыларымыз өткен жылды жақсы нәтижемен бітіріп, жақсы білім алды деген ойдамын. Балаларға айтарым, Жаңа жылда одан да көп жақсылыққа жетіп, ата-аналарыңызды, туған-туыстарыңызды жетістіктеріңізбен қуанта беріңіздер, – деп аудан әкімі мерекемен құттықтады.
Ізгі тілегін арнаған соң Жасұлан Тоққожаұлы шырша мерекесіне арнайы шақырылған балаларға сый-сияпаттар тапсырып, олармен естелікке суретке түсті.
Жаңа жылдық салтанатты шарада бүлдіршіндерді әдеттегідей Аяз ата мен Ақшақар да құттықтады. Сондай-ақ әлемге белгілі кинолардың және ертегілердің кейіпкерлері көңілді көріністер қойып, балалардың көңіл-күйлерін шаттыққа бөледі.
Айта кетейік, аудан әкімінің мерекелік сыйлықтары 109 балаға берілді. Сый-сияпаттың ішінде тәттілерден бөлек 30 мың теңге көлемінде киім алуға берілетін арнайы сертификаттар бар. Сонымен қатар, балаларға мерекелік кештен кейін «Mall Aport» ойын-сауық сауда орталығында арнайы дастархан жайылып, тамақ берілді.
Өз тілшіміз.
