Жақында Қарасай ауданында шахмат спортының дамуына үлес қосқан Мұқтар Ахметовты еске алуға арналған шахматтан турнур өтті. «Amanat» партиясының Қарасай аудандық филиалы ұйымдастырған бұл шара Шамалған ауылындағы Қарасай батыр атындағы орта мектебінде өтті. Оған 150-ден астам адам қатысып, доданың көрігін қыздырды. Жарыстың негізгі мақсаты – қарасайлықтардың шахматқа деген қызығушылығын оятып, ойынға деген шеберлігін шыңдау, бос уақыттарын тиімді өткізуге дұрыс бағыт беру және саламатты өмір салтын насихаттау.
Мұқтар Мұратханұлын еске алуға арналған бұл жиынға Алматы облысынан бөлек, Жетісу облысынан, Астана қаласынан, көршілес Қырғызстан елінен де қадірменді қонақтар келіп қатысты. Сонымен қатар, бұл шара барысында оның туысқандары да арнайы келіп, немересі турнирде барлығымен қатар өз бағын сынады.
Бастала сала қыза түскен дода бес кезеңнен тұратын швейцариялық жүйемен топтық есепте жүргізілді. Ойын барысында жас жеткіншіктер бар шеберліктерін салып, тартысқа толы ойын өрнегін көрсетті.
Бірнеше сағатқа созылған додада қателіктерге ұрынбай, қарсыластарын шаң қаптырғандардың мерейі өсті. Ақтық бәсекенің нәтижесіне сәйкес командалық жоғары ұпай есебімен жеңімпаздар алға суырылып шықты. Осылайша үздік ойын өрнегін көрсеткен шахматшылар ойлау қабілеттерінің ұшқыр екенін тағы да дәлелдеп, Алғыс хатпен және медальдармен марапатталды.
Бұрым ОРЫНБАСАР.