Жақында Кеген аудандық кітапханасының ұйымдастыруымен Кеген аудандық Мәдениет үйінде ғалым, ұстаз Сағатбек Медеубекұлының «Күй күмбірлеп, ән шалқыған» атты кітабының тұсаукесері өтті.
Іс-шараға Кеген ауданы әкімінің міндетін атқарушы К.Қабылбеков, аудандық мәслихат хатшысы А.Нұғыманов, ҚР Еңбек сіңірген қайраткері, дәстүрлі әнші Р.Стамғазиев, ақын Б.Әшірбаев, фотожурналист, «Фотоөнер» қоғамдық бірлестігінің төрағасы А.Әбдірайымұлы, Алматы облысы аудандық кітапханаларының басшылары мен аудан тұрғындары қатысты.
Алдымен, келген қонақтарға Сағатбек Медеубекұлының шығармашылығына арналған үш бөлімді «Дара дарын, қарымды қаламгер» атты кітап көрмесі таныстырылды. Қонақтардың арасынан алғашқы сөз кезегін аудан әкімінің міндетін атқарушы К.Қабылбеков алды. Сөз зергері С.Медеубекұлын құттықтап, арнайы иығына шапан жапты. Сағатбек Медеубекұлының «Күй күмбірлеп, ән шалқыған» атты жаңа кітабының тұсауы кесілді.
Игі шарада ақын Б.Әшірбаев, Алматы облыстық кітапханасы директорының міндетін атқарушы Ғ.Жалимханқызы, әнші Р.Стамғазиев және С.Досымбековтер кітапқа құтты болсын айтып, тұсаукесер рәсімін жүргізді. Осыдан кейін алма кезек сөз алған ұстаздың бір топ замандастары мен қаламдастары өз естеліктерімен бөлісті.
Шара соңы дәстүрлі әнші Р.Стамғазиев ақын Н.Айтұлының сөзіне жазылған, сазгер Т.Шапайдың «Дариға-дәурен» әнін орындаса, ақын-әнші Бақытжан Құсайынов, Кәдірбек Сүлеймен және Нұрым Байбала халық әндерін орындап, кештің көрігін қыздырды. Кеш соңын өнер зерттеушісі, филология ғылымдарының кандидаты Сағатбек Медеубекұлы қорытындылап, оқырман қауымға алғысын білдірді.
Индира ҚАНАТҚЫЗЫ.
КЕГЕН АУДАНЫ.