Қай жұмыс саласында да кәсіптік шеберліктің мәні үлкен, маңызы зор. Өз ісін шебер меңгерген, қандай қиын жағдайда да жол таба білетін мамандардан көп пайда келеді. Бұл ретте электр энергиясын өндіру жүйесіндегі жұмыстың, тіпті, жөні бөлек. Өйткені, мұнда қауіпсіздікке айрықша көңіл бөлінетіндіктен өте мұқият болу керек, әр істі де барынша тиянақты атқару қажет.
Осыған орай жыл сайын электромонтерлер арасында республикалық жарыс өткізіліп тұрады. Биыл ол Маңғыстау облысының орталығы Ақтау қаласында ұйымдастырылған еді. Аталған байқауға «Алатау жарық компаниясы» атынан қатысқан біздің Қарасай аудандық электр желісінің командасы бірінші орынға шығып, жүлдеге «УАЗ» автокөлігін алды! Сөйтіп, ел көлемінде бұрын да бірнеше рет жеңімпаз атанып, осындай жүлдеге қол жеткізген жігіттеріміз тағы да абырой биігінен көрініп, мәртебелері көтерілді.
Иә, Алмат Мамаев, Бекбол Әбдікерімов, Әділет Ташкенбаев, Нұрлан Шегебаев сияқты мықты жігіттерден тұратын қарасайлық энергетиктер өзгелерден қара озып шығып, шынайы шеберліктерін танытты. Ал, команданы Ақтауға аудандық электр желісінің бас инженері Сейдалиев Әділхан Жұмаханұлы бастап барған болатын.
Сонымен өткен аптада аудандық электр желісі кеңсесінің алдында салтанатты жиын болып, ол осы жеңіске арналды.
Республика бойынша жеңімпаз атанған электромонтерлерді алдымен «Алатау жарық компаниясының» басшысы, Алматы облыстық мәслихатының депутаты Мұхит Үмбетов шын жүрегімен құттықтап, ақ тілегін айтты.
– Сіздердің бұл жетістіктеріңіз, – деді Мұхит Әбікенұлы, – бәріміздің де мерейімізді өсірді. Осы үлкен жарыста электромонтерлік нағыз кәсіби шеберліктеріңізді, біліктіліктеріңізді таныта білдіңіздер. Сонымен қатар, әрине, ондағы қазылар қауіптілігі өте жоғары бұл жұмыстан адам өміріне қатер төнбеу жағына да баса назар аударғанын білеміз, осы тұрғыда да өздеріңіздің басқалардан озық тұрғандарыңыз өте жақсы нәтижеге алып келді. Құтты болсын!
Жиында сонымен қатар, аудандық электр желісінің басшысы Ерлан Момбаев та сөйлеп, ізгі тілегін білдірді.
Мұнан кейін компания басшысы салтанатты түрде қарасайлық энергетиктерге су жаңа «УАЗ» автокөлігінің кілтін тапсырды.
Жиында Қаскелең мәдениет колледжі студенттері ән айтып, күй шертіп энергетиктердің көңілін көтерді. Жан-жақтары гүлге толды. Әдемі музыка әуені алысқа естіліп жатты. Игі тілектер көп айтылды. Яғни, қарасайлық электромонтерлердің жемісті жеңісіне арналған аталған іс-шара өте жақсы деңгейде өткізілді дей аламыз.
Берікбай ҚАДЫҚОВ.