Көше тұрғындары Наурызды тойлады

Татулықты арттырып, береке-бірлікті бекем ететін қазақ халқы үшін әз Наурыз мейрамының орны ерекше. Ұлыстың ұлы күнін тек арнайы белгіленген жерде емес, қай жерде тойласа да жарасымды. Тіпті, ауыл-ауыл болып, көше бойында атап өтсе де айтулы күннің маңыздылығы арта түсері анық. Дәл осы үрдісті Қаскелең қаласындағы 218 кварталының тұрғындары мақсат тұтып, өткен аптаның сенбісі, яғни Ораза айт күнінде ұлттық мейрамды атап өтті.
Бүгінгі таңда аталған көшенің бойында 50 шақты отбасы тұрады. Татулығы жарасқан көршілер осыған дейін де басқа игі шараларға атсалысып келген. Мәселен, ел Президентінің «Таза Қазақстан» акциясына қолдау білдіріп, сенбілік жұмыстарын ұйымдастырудан қалыс қалған емес. Мұндай бірлесе атқаратын бастамалар олардың әдетіне айналған. Енді міне, көршілер қауымы әз Наурыз мейрамын тойлап, ынтымағы берік екенін тағы көрсетті. Ұлттың мейрамға орай тұрғындар көше бойында киіз үй тігіп, Ұлыстың ұлы күнін Ораза айтпен бірге тойлады.
Шара барысында қазақтың салт-дәстүрі дәріптеліп, ұлттық тағам – Наурыз көже таратылды. Сондай-ақ өнерлі адамдар ән салып, көңілді кештің көркін қыздырды. Аудандық әкімдіктің де өкілдері құрметті қонақтардың қатарынан табылып, көршілер қауымына ізгі тілегін білдірді.
Ал көше тұрғыны, «Хамза» спорт клубының басшысы Нұржан Тілеубергенов спорттық ойындар ұйымдастырды. Бұл ретте жиналған көпшілік шахматтан бақ сынап, арқан тарту, кір тасын көтеру сияқты спорт түрінен күш сынасты.
Осындай мерекелік басқосудың басы-қасында жүрген, ұйымдастырушылардың бірі – Тұрғанбек Оразалиев. Ақсақалдың айтуынша, 218 кварталдың тұрғындары әрдайым ұйымшыл және ұлттық мейрамды ұлықтауға көшедегі әрбір отбасы атсалысқан.
– Бұл шараға жиналудағы мақсатымыз – әз Наурызымызды көпшілік болып атап өту, сондай-ақ көршілер арасында өзара қарым-қатынасты арттыру. Осы игілікті істі атқаруға қол ұшын созған, белсенділік танытқан көршілеріме алғыс айтамын. Алдағы уақытта да бұл үрдісті жалғастыру ойымызда бар, – деді Т.Оразалиев.
Өз тілшіміз.