Көне жәдігерлердің көшпелі көрмесі өтуде

Қаскелеңде орналасқан Қарасай аудандық тарихи-өлкетану музейі көптеген жылдар жәдігерлерді жинақтап, сақтап, көпшілікке таныстырып, кеңінен насихаттап келе жатқан мәдени мекен. Таяуда ол өзінің 25 жылдық мерейтойын атап өткен еді. Музей үшін маңызды мерекеге орай Түркістан облысының тарихи-өлкетану музейі ерекше сыйлық жасап, «Тарихтың көркем келбеті» атты этнографиялық көшпелі көрмесін ұйымдастырды. Аптаның сейсенбісі күні оның салтанатты ашылу рәсімі өтті.

Ата-бабаларымыз тұтынған тұрмыстық заттарды көрсету, музейдің этнографиялық түсімдері ретінде қалыптасқан экспонаттарды насихаттауға бағытталған шараға аудандық «Қазақ тілі» қоғамының төрайымы Шара Қанатқұлқызы, Қазақстан Журналистер одағының мүшесі Ақлима Көсемова, ардагер ұстаз Баян Әбдікәрімқызы секілді ауданымыздың зиялы қауымы мен оқушылар қатысты.
Алғашқы сөз Түркістан облыстық тарихи-өлкетану музейі экспозициялық-көрмелік қамтамасыз ету бөлімінің меңгерушісі Мейірлан Дәулетұлына берілді. Ол бұл көрме музей қорындағы көне жәдігерлерді Қарасай жұртына таныстыру, дәріптеу үшін ұйымдастырылып отырғандығын айтып өтті. Сондай-ақ 1920 жылы ашылған еліміздегі ең көне музейлердің бірі болып табылатын облыстық тарихи-өлкетану музейі жайында қысқаша ақпарат берді.
Одан кейін сөз кезегін Шара Қанатқұлқызы, Баян Әбдікәрімқызы және Ақлима Көсемова алып, аудандық тарихи-өлкетану музейінің өткені мен бүгінгі жетістіктері жайында әңгімеледі. Музейдің ғимараты бастапқы кезде мектеп одан кейін мұғалімдер жатаханасы болғаны, алғашқы Президентіміз Нұрсұлтан Назарбаевтың қолдауымен музейге айналған сәті туралы естеліктерімен бөлісті. Сол уақыттан бері мұнда көптеген тарихи, рухани және мәдени маңызды жәдігерлердің жинақталғандығын және де осы бағытта жұмыс жасап жатқан музей қызметкерлерінің еңбегі ұшан теңіз екенін жеткізіп, оларға алғыстарын білдірді.
Құрметті апаларымыздан кейін аудан өнерпаздары мен Абай атындағы орта мектеп-гимназиясының биші қыздары әуелете ән салып, мың бұрала би билеп, көрме қонақтарына көтеріңкі көңіл-күй сыйлады.
Шағын концерттік бағдарламадан соң шараның негізгі бөлімі басталып, Түркістан облыстық тарихи-өлкетану музейі директорының орынбасары Қанат Сағынтаев пен Шара Қанатқұлқызы көрмені ашу үшін салтанатты түрде лентаны қиды.
Сонау Түркістан облысынан келген жылжымалы экспозицияға сирек этнографиялық, зергерлік, қазақ халқының ұлттық салт-дәстүрі мен тұрмысын танытатын жәдігерлер қойылады.
Аудан тұрғындары ағаштан, теріден жасалған тұрмыстық заттар, түрлі тәсілмен жасалған қолөнер бұйымдары, күмістен жасалған әшекей бұйымдары, бейнелеу өнері туындылары және тағы да басқа жәдігерлермен жақынырақ таныса алды.
«Музей көненің көзі-өмірдің өзі» демекші, көне заттарды дәріптеп жүрген Түркістан облыстық музей қызметкерлерінің көшпелі көрмесі көптің көңілінен шықты. Жиналған оқушылар бұрын көрмеген ескі жәдігерлермен танысып, олар жайында жаңа ақпарат алып қайтты.
Айта кетейік, бабалар мұрасын жаңғыртып, ұлттық құндылықтарымызды дәріптейтін көрмені желтоқсан айының 12-не дейін тегін тамашалауға болады.
Ақтоты МЫРЗАБЕКҚЫЗЫ.