Күйшінің келбеті көрікті көрініске айналды

Қаскелең қаласында тағы бір көпқабатты тұрғын үйдің қабырғасы көрікті көрініске айналды. Бұл жолы қала әкімдігіне қарама-қарсы орналасқан үйлердің біріне даңқты композитор, күйші Нұрғиса Тілендиевтің бейнесі салынды.

Қазақ даласын әнімен тербеген өнер қайраткерінің туғанына биыл 100 жыл толып отыр. Халық қаһарманының осы бір айтулы мерейтойының қарсаңында Қарасай ауданының әкімдігі ұлт тұлғасына құрмет танытып, оның есімі мен өнер жолын ұлықтау үшін келісті келбетін халыққа паш етуді жөн санады. Осы мақсатта аудан әкімдігі Қаскелең қаласындағы Байғазиев пен Төле би көшелерінің қиылысындағы көпқабатты үйге Нұрғиса Атабайұлының муралын салу үшін суретші Еркеғали Иманғалимен келісім жасасқан. Өнер туындысының авторы атақты композитордың бейнесін салуға бар-жоғы үш күнін ғана жұмсаған.
– Композитор Нұрғиса Тілендиевтің муралын салуға тапсырыс Қарасай ауданының әкімдігі тарапынан түсті. Бұл – біздің Қаскелең қаласындағы екінші жұмысымыз. Осыған дейін Ұлы Жеңістің 80 жылдығына орай, Кеңес одағының батыры Бауыржан Момышұлының муралын салған едік. Енді, міне атақы күйшінің бейнесін көпшілікке ұсынып жатырмыз. Жалпы, қос бірдей даңқты тұлғаның муралын салу жөнінде тапсырысты көктемнің басында алған болатынбыз. Одан кейін әрбірінің кескін-келбетіне байланысты бірнеше эскиз жобасын дайындап, әкімдікке ұсындық. Ұнағанын таңдаған соң, бірден іске кірісіп кеттік, – деді суретші Еркеғали Иманғали.
Қабырғадағы суретті салуға аэрозоль бояулары қолданылған. Өйткені олар өте сапалы болғандықтан, кез келген бейне ұзақ сақталады. Суретші Еркеғали мырзаға мұндай жұмыспен айналысып жүргеніне алты жылдай болған. Айтуынша, қолөнеріне осы уақытқа дейін еш шағым түспеген.
Айта кетейік, Ұлы Жеңістің 80 жылдығына орай, 9 мамыр күні Қаскелеңдегі Қарасай батыр мен Мақашев көшелерінің қиылысында ерліктің үлгісіне айналған батыр, жауынгер Бауыржан Момышұлының муралы пайда болған еді. Бұл – аудан орталығындағы арт-нысандардың алғашқысы. Енді, міне КСРО-ның халық әртісі, күйші, дирижер Нұрғиса Тілендиевтің бейнесі қаланың сәулетті суреттерінің біріне айналды.

Дидар МӘЛІКҰЛЫ.