Төрт жылдық тәжірибесі бар «Obrain» оқу орталығы өз жұмысын жақында ғана ел игілігіне берілген Береке ауылындағы Мәдениет үйінде жалғастыруда. Енді елтайлықтардың мұнда балаларын ментальді арифметиканы оқытуға, шығармашылыққа, ағылшын және орыс тілдерін меңгеруіне, ҰБТ-ға, мектепке дейінгі оқуға дайындауға мүмкіндіктері бар. Ал, ересектер үшін бухгалтерлік және компьютерлік бағдарламаларды үйрету бойынша курстар қарастырылған.
Жақында аталған оқу орталығының жетекшісі Жанар Тұрғынбаева жоғарыда көрсетілген ақылы курстарында әлеуметтік жағдайы төмен отбасындағы балалар мен көп балалы аналарға тегін білім берсек деген бастаманы көтерді. Оның бұл ұстанымын жергілікті атқарушы органдар, мәдениет ошағының ұжымы және көмектесуге ниетті еріктілер бірден құптап, қолдауларын білдірді. Сонымен қатар, осы игі бастаманың аясында Елтай ауылдық округіндегі мектептердің психологтары түрлі тақырыптағы тренингтер өткізеді. Оның алғашқы сабағы өткен сенбіде басталып, «Булинг. Виртуалды булинг әдістері» тақырыбына арналды.
Мұндай қоғамдағы мәселелерді талқылайтын тренингтер әр аптаның сенбісінде болады. Орталық жетекшісі Жанар Аманжолқызының айтуынша, аталған білім беру мекемесі өз жұмыстарын одан әрі жандандыра бермек.
– «Obrain» оқу орталығында тегін курсттар ашсақ деген бастаманы күйеуім екеуміз көтерген болатынбыз. Осы ұсынысымда қолдаған жергілікті әкімдікке, Мәдениет үйіне және ауылымызда қайырымды істерімен танымал ерікті Әлия Сәтпаеваға алғысымды білдіремін. «Жалғыздың шаңы шықпас» демекші, бір өзімнің осындай жауыпты істі атқаруға шамам келмес еді. Әрине, мектеп психологтарының да атқарып жатқан жұмыстары ауқымды. Біз бұнымен тоқтап қалмаймыз. Әрі қарай дамып, алдағы уақытта қосымша топтарды ашатын боламыз. Бұл курстар Елтай ауылдық округінің тұрғындары үшін қолжетімді екенін айтып өткім келеді, – деді Жанар Тұрғынбаева.
Міне, 28 жылдан кейін қайта жаңғырған Мәдениет үйі елтайлықтардың тек мәдени жағынан емес, рухани және білім бағытындағы жұмыстарын одан әрі жетілдіріп, заман талабына сай әлеуметтік бейімделуге де өз үлесін қосуда.
Бұрым ОРЫНБАСАР.