Елдік пен ерлікті ұлықтайтын күн

Ел қорғанысының бекемдігін сипаттайтын айрықша мереке – Отан қорғаушылар күні. 7 мамырда атап өтілетін рухты жігіттердің айтулы күні Қарасай ауданында салтанатты жағдайда мерекелік басқосуға ұласты. Мәдениет үйінде ұйымдастырылған игі шараға аудан әкімі Жасұлан Естенов арнайы қатысып, қарасайлық ерлер қауымын құттықтады.

Мерекелік жиында алдымен сахна төрінде шекарашы, өрт сөндіруші, сарбаз сияқты жауапты міндеттің тізгінін ұстаған жандардың табандылықтары сахналанды. Одан кейін аудан басшысы Жасұлан Тоққожаұлы барлық қарасайлық азаматтарды құттықтап, олардың аудан дамуы жолында атқарып жатқан жұмыстарының еселі екенін айтты.
– Бұл мереке Отанымыздың амандығы мен тәуелсіздігін қорғау жолындағы ержүрек азаматтардың құрметіне арналған. Ата-бабаларымыздың жауынгерлік дәстүрін сақтап, қазіргі ұрпақ та Отан қорғаудың абыройлы міндетін адал атқарып келеді. Ел үшін жауынгерлік рух пен айбындылықты ұстанып, еліне қызмет етіп жүрген азаматтарға алғысымыз шексіз. Мерекелеріңіз құтты болсын! – деп аудан әкімі ізгі тілегін жеткізген соң, өз атынан бірнеше сала мамандарына Құрмет грамоталары мен Алғыс хаттарын табыс етті. Аудан басшысының ыстық ықыласына бөленгендердің қатарында қадірлі қариялар, түрлі бірлестік ұйымдардың жетекшілері, кәсіпкерлер, құқық қорғау органдарының, сондай-ақ дін, спорт, білім, БАҚ саласының өкілдері және мемлекеттік қызметшілер болды.
Ерлік пен елдік ұлықталған салтанатты шарада ер азаматтардың құрметіне аудан өнерпаздары концерттік бағдарлама ұсынып, әуезді әрі патриоттық әндер шырқады.
Өз тілшіміз.