Ел тыныштығына жауаптылар құрметке бөленді

Кез келген мемлекет бірінші кезекте ішкі тыныштық пен халқының бейбіт өмір сүруіне жағдай жасауға талпынады. Бұл ретте адам-дардың қауіпсіздігін қамтамасыз етіп, асқан жауапкершілікті жұмысты атқарып жүрген тәртіп сақшыларының еңбегі ерен.
Күні кеше маусым айының 23-і күні аталып өткен ҚР Полиция күніне орай аудандық Мәдениет үйінде «Полиция – ел қорғаны» атты салтанатты шара өтіп, ішкі істер саласында абыройлы қызмет етіп жүрген қарасайлық тәртіп сақшыларына құрмет көрсетілді. Жиынға аудан әкімі Жасұлан Естенов бастаған ауданның зиялы қауымы, полиция басқармасының басшылығы, ардагерлер, жеке құрам, сондай-ақ қызмет жолының қызығын енді көріп жатқан жас сақшылар қатысты.

Мерекелік кештің шымылдығы «Қарасай Жастары» театры дайындаған «Полиция – ел қорғаны» атты поэтикалық шерумен ашылды. Мұнан кейін жиналғандар Мемлекеттік гимнді орындап, қоғам тыныштығы мен қауіпсіздігі үшін өз өмірлерін құрбан еткен азаматтардың рухына тағзым етіп, бір минут үнсіздікпен еске алды.
Шараның алғашқы құттықтау сөзі аудан әкімі Жасұлан Тоққожаұлына берілді. Аудан басшысы жиналған сала өкілдерін құттықтап, жыл көлемінде атқарылған іргелі істер, сондай-ақ бірқатар тәртіп сақшыларының көрсеткен ерліктері туралы кеңірек айтып өтті.
– Бүгінгі күнде ауданымызда 329 полиция қызметкерлері халықтың тыныштығы мен қоғамдық тәртіпті сақтап, тұрмысымыздың тұрақтылығын қамтамасыз етуде. Тәртіп сақшыларының 2025 жылдың алғашқы бес айындағы жұмыс нәтижесінің қорытындысына сәйкес, аудан аумағында жалпы тіркелген қылмыстар саны 35,2 пайызға төмендеген. Бұл көрсеткіш жергілікті атқарушы және тиісті құзырлы органдардың бірлескен жұмыстарының нақты нәтижесі деп білемін.
Оған қоса соңғы жылдары Қарасай ауданында қырағылық пен батылдық көрсетіп, бірнеше адам өмірін құтқарып қалған полиция қызметкерлері көзге түсуде. Атап айтқанда, Қаскелең қаласында тұрғын өз-өзіне қол жұмсамақ болған сәтінде №186 борттағы патрульдік полиция қызметкерлері — майор Б. Жарқынбеков, лейтенанттар Д. Жапаров пен А. Айтен жедел әрекет етіп, оның өмірін сақтап қалған.
Сонымен қатар, Кемертоған ауылында болған тағы бір төтенше жағдайда пышақ жарақатын алып, есінен танған ер адамға патрульдік полиция инспекторлары Мадияр Шетікбаев пен Мейіржан Әбдімомынов алғашқы медициналық көмек көрсетіп, жансақтау бөліміне жедел жеткізгеннің нәтижесінде жаны аман қалды.
Аталған оқиғалар – аудан полицейлерінің кәсіби шеберлігі мен адам өміріне деген жауапкершілігінің айқын көрінісі деп білемін.
Сөз соңында айтарым, тәртіп сақшыларының еңбегі қашанда ерен болмақ. Баршаңызға зор денсаулық, отбасыларыңызға амандық, еліміздің жарқын болашағы жолында атқарып жатқан жұмыстарыңызға сәттілік тілеймін!, – дей келе Жасұлан Естенов елеулі еңбек етіп жүрген қызметкерлерді өз атынан Құрмет грамотасы мен Алғыс хатпен марапаттады.
Мұнан соң сахна төріне аудандық полиция басқармасының басшысы, полиция полковнигі Нұсқабек Зауланбаев шығып, әріптестерін құттықтап, жылы лебізін жеткізді. Сондай-ақ мереке аясында көптеген жылдар бойы ішкі істер саласының дамуына сүбелі үлестерін қосқан полиция ардагерлеріне алғысын айтып, иықтарына шапан жапты. Ал кейбіріне «Қазақстан полициясына – 30 жыл» мерекелік төсбелгісін табыстады.
Оған қоса ел тыныштығын қорғап жүрген бірқатар абыройлы полиция қызметкерлерінің аналары мен әйелдерін «Офицер анасы», «Офицер әйелі» атты медальдармен марапаттады.
Басқарма басшысы бүл күні жас қызметкерлерді де назардан тыс қалдырмай, олардың ата-аналарына грамота табыс етті.
Салтанатты шара әрі қарай аудан өнерпаздары өнерлерін паш еткен концерттік бағдарламаға ұласып, мереке иелеріне олардың жұмысы мен батылдығы дәріптелген әуезді әндер шырқалып, әсем билер тарту етілді.

Ақтоты МЫРЗАБЕКҚЫЗЫ