Екі елдің арасында сенім мен стратегиялық әріптестік сәтті жүзеге асуда

Қазақстан мен Қытайдың білім беру саласындағы ынтымақтастығы соңғы жылдары тұрақты даму серпінін көрсетіп келеді. Бүгінде Қытай – ең бәсекеге қабілетті жоғары оқу орындары шоғырланған ел ретінде қазақстандық студенттер үшін барған сайын тартымды бағытқа айналуда. Қазіргі таңда Қытай университеттерінде Қазақстанның 14 мыңға жуық азаматы білім алуда.

Қазақстан аумағында жетекші Қытай университеттерінің филиалдары ашылып, сәтті жұмыс істей бастауы – екіжақты сенім мен стратегиялық әріптестіктің айқын көрінісі. 2023 жылы әл-Фараби атындағы ҚазҰУ базасында ҚХР Солтүстік-батыс политехникалық университетінің, 2024 жылы Астана халықаралық университетінде Бейжің тіл және мәдениет университетінің, сондай-ақ Қ. Сәтпаев атындағы ҚазҰТЗУ-да City University of Hong Kong филиалдарының ашылуы – осы бағыттағы нақты қадамдар.

Сонымен қатар, Астана, Алматы, Қарағанды және Ақтөбе қалаларында жұмыс істеп жатқан Конфуцийдің 5 институты – білім берумен қатар, мәдениетаралық диалогты нығайтатын маңызды алаңдар. Олар жастардың Қытай тілі мен мәдениетіне деген қызығушылығын арттырып, өзара түсіністікті тереңдетуге ықпал етеді.

Технологиялық әріптестік те ерекше назар аударарлық. Қолданбалы ғылым мен техникалық білім беру саласында “Лу Бань шеберханалары” — нақты нәтиже беріп жатқан жобалар. Шығыс Қазақстан техникалық университетінің базасында ашылған алғашқы шеберханада студенттер заманауи автокөлік технологияларын меңгеруде. Биыл Еуразия ұлттық университетінде екінші “Лу Бань шеберханасының” ашылуы жоспарланып отыр.

Абай Жұманиязов,

Жібек жолы ауылының ақсақалдар кеңесінің төрағасы