Екі білім ошағы қолданысқа берілді

Қарасай жерінде «Жайлы мектеп» ұлттық жобасы сәтті түрде жүзеге асып келеді. Президенттің бұл байыпты бастамасы, әсіресе ауданымыздағы үш ауысымдағы оқыту жүйесін жоюға ықпал етуде.
Аталған жоба аясында Қарасай ауданында жалпы алғанда 10 мектеп салу жоспарланған болса, соның төртеуі оқу жылынан бастап бүгінге күнге дейін пайдалануға берілді. Ал сәрсенбінің сәтінде тағы екі мектеп ел игілігі үшін есігін айқара ашты. Олардың бірі – Қаскелеңдегі SDU университетіне қарама-қарсы орналасқан ғимарат болса, екіншісі – Кемертоған ауылындағы білім ошағы.

Мектептердің ашылу салтанатына Алматы облысының әкімі Марат Сұлтанғазиев, «Samruk-Kazyna Construction» АҚ-ның Басқарма төрағасы Мәулен Айманбетов, сондай-ақ облыстық білім басқармасының басшысы Салтанат Беспаева, аудан әкімі Жасұлан Естенов және облыстың, ауданның Құрметті азаматтары мен ардагер-ұстаздары қатысты.
Облыс басшысы Марат Елеусізұлы бастаған құрметті меймандар алдымен Қаскелеңдегі «Жайлы мектептің» ашылу рәсіміне куә болды. Салтанатты басқосуда облыс әкімі М.Сұлтанғазиев сөз сөйлеп, ұлттық жоба жайында ойын білдірді.
– Бүгінгі таңда өскелең ұрпақтың сапалы білім, саналы тәрбие алуы үшін барлық жағдай жасалуда. Соның дәлелі ретінде ұлттық жоба аясында кезекті мектеп қолданысқа берілгелі тұр. Бұл жоба бойынша облысымызда жеті мектеп пайдалануға берілсе, оның алтауы Қарасай ауданына тиесілі. Қарасай ауданы күн санап тұрғындар қатары артып келе жатқан өлке болғандықтан, мектеп ғимараттарын осында салуды жоспарлаған едік. Бұл құрылыстың аяқталуымен аудандағы үш ауысымды мектеп мәселесі толығымен шешілмек. Мұның сыртында өлкемізде жеке инвесторлардың көмегімен 4 мектеп, жергілікті бюджет қаржысына тағы 2 мектеп салынатын болады, – деді Марат Елеусізұлы.
Сондай-ақ облыс басшысы бұл мектептің тағы бір ерекшелігіне тоқталды. Айтуынша, бұл білім ұясының еліміздегі ең таңдаулы жоғары оқу орындарының бірі болып табылатын SDU университетінің жанында орналасуы бекер емес.
– Бүгінде осы университеттің ұжымымен бірлесе білім беру жоспарланған. Университет мектеппен ынтымақтастықта жұмыс істейтін болады. Бұл республикалық рейтингте алғашқы орындардан көрініп келе жатқан білім беру саласы одан да жоғары нәтижелерге жетеді деп сенемін, – деп облыс әкімі сөзін сабақтап, көпшілікті мектептің ашылуымен құттықтады.
Марат Сұлтанғазиев ізгі тілегін білдірген соң, ғимараттың құрылысын жүргізген «BI Global» компаниясының бірқатар өкілін Алғыс хатымен марапаттады.
Мектептің ашылу салтанатына орай құрметті қонақтардың қатарында болған «Samruk-Kazyna Construction» АҚ-ның Басқарма төрағасы Мәулен Зарлықұлы мен SDU университетінің ректоры Әлімжан Бекжанұлы да құттықтау сөздерін арнады. Одан кейін «BI Global» ЖШС-нің құрылыс басшысы мектептің кілтін ресми түрде директордың міндетін атқарушы Айбек Досымбековке табыс етті. Салтанатты шараның соңы ауданның ғана емес ел мақтанашы болған, «Славян базары» байқауының өткен жылғы жеңімпазы Шерхан Арыстанның әнімен түйінделді.
SDU университетінің маңындағы үш қабатты білім ошағы 1500 оқушыға арналған. Жаңа мектептің іргетасы өткен жылы көктемде қаланған. Құрылысына жауапты мердігер мекеме «BI Global» компаниясы, тапсырыс берушісі «Samryk-Kazyna Construction» ЖШС болып табылды. 3 га жер телімінде салынып жатқан ғимараттың жалпы аумағы 16 998 шаршы метрді қамтиды. Мұнда бір емес, бірнеше спортзал, 324 орынға арналған асхана мен актзал бар. Кабинеттері заманауи үлгідегі жиһаздармен жабдықталған.
Жоғарыда атап өткендей, дәл осы күні Кемертоған ауылында да «Жайлы мектеп» ұлттық жобасы аясында салынған тағы бір білім шаңырағы пайдалануға берілді. Қаскелеңдегі мектептің ашылуында болған құрметті қонақтар бірден осы мектептің ашылу рәсіміне қатысып, оқушылар мен ұстаздардың қуанышына ортақтасты.

Мұндағы игі шарада да облыс басшысы Марат Сұлтанғазиев құттықтау сөз сөйлеп, ел Президенті бастамышыл болған ұлттық жобаның ұтымды тұстарын айрықша атап өтті. Әдеттегідей, мердігер мекемеге ризашылығын білдіріп, өз атынан Алғыс хаттарын табыс етті.
Сонымен қатар мектептің ашылу сәтіне көпшілікпен куә болған ауданның Құрметті азаматы Ұлтусын Бархинова да ақ тілегін арнады. Ардагер-ұстаз өз сөзінде осындай керемет білім мекеменің салынуына ұйытқы болған басшылыққа, құрылыс компаниясына ризашылығын білдірді.
Ал жаңа ғимараттың кілтін «BI Global» компаниясының жоба жетекшісі Қанат Нұрымов салтанатты түрде мектеп директорының міндетін атқарушы Дәурен Саусақбаевқа тапсырды.
Шараның соңында «Үшқоңыр» квартеті әуезді ән шырқап, қуанышты сәтті керемет нотада аяқтады.
Кемертоған ауылындағы білім ұясының қолданысқа берілуі, расымен жергілікті тұрғындар үшін қуанышты жаңалыққа айналды. Өйткені аталған елді мекендегі жалғыз мектептің үш ауысымдық оқыту мәселесін шешіп отыр. Мұнда осы уақытқа дейін 6000-ға жуық бала оқыған. Ал 1500 орындықты «Жайлы мектепте» шамамен 2500-3000-ға жуық оқушы білім алу жоспарланып отыр.
Айта кетейік, Қарасай ауданында осындай жаңа нысандардың бой көтеруі үш ауысымда білім беруді жоюға ықпал етуде. Мәселен, «Жайлы мектеп» ұлттық жобасы аясында және жергілікті бюджет есебінен салынған мектептердің саны жетіге жетті. Осылайша үш ауысымдағы мектептердің саны 12-ден 2-ге азайды.
Дидар МӘЛІКҰЛЫ.