Бүгінде Қарасай жерінде еліміздің экономикасының және әл-ауқатының жақсаруына септігін тигізіп жатқан нысандар бой көтеруде. Сондай мекемелердің бірі – республикалық «Алматы» Олимпиадалық даярлау орталығы». Аумағы 40 гектар жерді алып жатқан бұл спорттық кешен тек Қазақстанның ғана емес, сондай-ақ Тәуелсіз Мемлекеттер Достастығы (ТМД) елдерінің ішіндегі ең ірі даярлау орталығы болып саналады.
Президент Қ.Тоқаевтың «Олимпиадалық даярлау орталығына» келген сәті
«Алматы» Олимпиадалық даярлау орталығы директорының орынбасары Ермахан Ибраимов
Айта кетейік, Іргелі ауылдық округінің аумағында орналасқан аталмыш кешеннің бой көтеруі 2005 жылы басталған еді. Алайда қаржылық және басқа да мәселелерге байланысты құрылыс жұмыстарында жиі үзіліс болды. Анығырақ айтқанда, жобалық бой көтерілуінің алғашқы кезеңі 2005 жылы басталып, 2016 жылы тоқтатылған. Ол кездері бюджеттен 28 млрд. теңгеден астам қаржы жұмсалған. Екінші кезең 2016-2019 жылдар аралығында жүргізіліп, қаражаттың жетіспеушілігінен тағы төрт жылға тоқтап қалған. Жалпы құрылысы басталғаннан бері аталған кешенге 105,7 млрд. теңге жұмсалды.Кейіннен бұл жұмыстар қайтадан қолға алынып, құрылысы белсенді түрде жүргізіліп, 2024 жылы қолданысқа берілді.
«Алматы» Олимпиадалық даярлау орталығы директорының орынбасары Ермахан Ибраимовтың айтуынша, аталған кешеннің салынуының негізгі мақсаты – халықаралық стандарттарға сай келетін спорт түрлерінің материалдық-техникалық базасын дамыту және нығайту, спорт түрлерінен ұлттық құрама командаларды дайындау.
Жалпы мұнда бүгінде оқу-жаттығу сабақтарын, емдеу-сауықтыру шараларын, халықаралық және республикалық жарыстар өткізуге арналған 9 жабық спорт ғимараты орналасқан. Бұдан бөлек, жеңіл және ауыр атлетика, волейбол, баскетбол, шағын футбол, шайбалы хоккей, коньки спорты, бокс, күрестің барлық түрі, жекпе-жек өнері, су спорты, спорттық оқ ату, садақ ату секілді спорттың түрлерінен жаттығу орталықтары бар. Кешен о бастан жаздық олимпиадалық ойындарынан даярлауға арналғандықтан, мұнда 16 жаздық спорт түрінен және төрт қыстық спорт түрінен, сондай-ақ волейбол секілді қосымша үш спорт түрінен жаттығуға болады.
Жабық жаттығу кешендерінен бөлек нысан аумағында жазғы ойын алаңдары, медициналық пункт, әкімшілік ғимарат бар. Сонымен қатар мұнда сыйымдылығы 6246 көрерменге дейін жететін стадион да орналастырылған. Бұған қоса қазіргі уақытта 300 адамға арналған медициналық пункттің құрылысы аяқталып, оны ашу үшін дайындық жұмыстары жүргізілуде. Нақтырақ айтқанда, орталық директорының орынбасары Ермахан Сағиұлының сөзіне сүйенсек, бүгінде шет елдің медицина қызметкерлерімен байланыс орнатылып, алдағы уақытта солардың тәжірибесіне сүйеніп, жұмыс барысын қою жоспарланып отыр.
Жоғарыда аталғандардан бөлек осында дайындалатын спортшыларға арналған төрт жұлдызды 420 адамдық қонақ үй бар. Онда қолайлы бір және екі бөлмелі демалыс нөмірлерінен бөлек спортшылардың кешкі уақыттарын қызықты өткізулері үшін кітапхана, боулинг, кинотеатр және тағы да басқа ойын-сауық орталығы қарастырылған.
Бір мезетте 2300 спортшы емін-еркін шыныға алатын спорт орталығында қазіргі таңда 519 спортшы жаттығуда, сондай-ақ 262 қызметкер жұмыс істеуде. Олардың көбі – Қарасай ауданының жұрты. Директор орынбасары Ермахан Ибраимов алдағы уақытта жұмысшылар санын 500-ге дейін ұлғайту жоспарда бар екенін айтты.
Спорт кешені ашылғаннан бері мұнда Қазақстанның барлық аймақтарынан спортшылар, ұлттық құрама командалары келіп жаттығуда. Ал келешекте жоспарға сай Біріккен Араб Әмірліктерінің жүзушілер құрама командасы, Өзбекстанның шағын футбол (футзал) құрама командасы, сондай-ақ Индия, Қытай және Өзбекстан елдерінің құрама командаларының біріккен оқу-жаттығулары өтетін болады.
Тағы бір айта кетерлігі, аталмыш орталық ашылар кезде Мемлекет басшысы Қасым-Жомарт Тоқаев арнайы келіп, ТМД-дағы ең ірі спорт кешендерінің бірі саналатын инфрақұрылымды аралап көрген еді. Президент халықаралық стандарттарға сай нысан бойынша атқарылып үлгерген жұмыстар жайында туризм және спорт министрі Ермек Маржықпаевтың толыққанды баяндамасын тыңдап, аталған базаның орталық алаңындағы олимпиада алауының жанында спортшылармен әңгімелесті. Оның барысында Қасым-Жомарт Кемелұлы қазір негізгі күш-жігерді Олимпиада мен Азия ойындарына, сондай-ақ өзге де еуропалық, әлемдік деңгейдегі турнирлерге дайындалу үшін жұмсау керектігін және де оған Қазақстан спорт державасы болуға тиіс екенін айтып өтті. Сондықтан елімізде аталған қалашық секілді маңызды спорт нысандарын салынып жатқандығын жеткізді. Жалпы Мемлекет басшысы орталық бойынша жасалып жатқан жұмыстардың нәтижесіне риза болды.
Әкімшілік ғимараты Аумағы 2,8 мың шаршы метрлік төрт қабатты нысанда аталған орталықтың жұмысына жауапты басшылық пен мамандар отырады. Мұнда жұмыскер бөлмелерінен бөлек әртүрлі деңгейдегі конференция, брифингтер мен жиындар өткізуге мүмкіндік беретін үлкен конференц-зал орналасқан. Ол жерде тек осы орталықтың ғана емес, сондай-ақ еліміздегі өзге салаларға байланысты ауқымды басқосулар ұйымдастырылады. Сонымен қатар Қазақстанның спортшыларына арналған музей де қарастырылған. Жоғарыда айтып өткеніміздей, бүгінде даярлау орталығында 262 адам жұмыс істейді. Алайда алдағы жоспарға сай тұрақты түрде қызмет ететін қызметкерлер санын 500-ге дейін ұлғайту жоспарланып отыр.
Гимнастика мен ауыр атлетика кешені Ғимараттың ішінде бірнеше залдар орналасқан. Гимнастарға арналған залдың өзі үш бөлікке бөлінген, онда спортшылар батуттық, спорттық және көркем гимнастикамен емін-еркін айналыса алады. Зілтемір көтеретіндер үшін екі жаттығу және бір жарыс аймағы қарастырылған. Сондай-ақ мұнда семсерлесушілерге де (фехтовальщики) жаттығуға және жарыс өткізуге жағдай жасалған. Барлық бөлмелер заманауи жабдықтармен толық жабдықталған. Олардың бәрінде қауіпсіздік шаралары ескерілген. Өзге кешендердегідей мұнда да жаттықтырушылар өз командаларымен келіп жаттыққан кезде қауіпсіздік шаралары сақталуын арнайы қызметкерлер бақылап жүреді. Аумағы 13,9 мың шаршы метрді алып жатқан нысанның ішіндегі трибуна 793 орынға есептелген.
Жүзу орталығы Су спортының түрлерін дамытуға арналған кешенде спортшылар жүзуден, доппен жүзумен, көркем жүзден және де суға секіруден жаттыға алады. Ғимаратта 10 жолақты 50 м олимпиадалық жүзу бассейні бар, ол электронды хронометраж жүйесімен және қысқа мерзімді жарыстарға арналған жылжымалы платформамен жабдықталған. Жаттығулар мен жарыстар өткізуге арналған мұнаралармен және трамплиндермен жабдықталған бөлек сүңгуір алаңы да бар. Жаттығу залындағы ауа температурасы да үнемі бақыланып отырады. Бұл жерде де өзге нысандардағыдай ғана спортшыларға арналған киім ауыстыратын және жуынатын бөлмелер қарастырылған. Нысанның жалпы аумағы – 15,0 мың шаршы метр. Адамдар отыратын турибуна – 1301 орындық.
Жекпе-жек кешені Жалпы бұл ғимарат күрестің, таэквондоның, дзюдоның және бокстың барлық түрлерін дамытуға арналған. Нысанның жобасы әр залға күреске арналған сегіз төсенішке, таэквондоға алты даянга, дзюдоға бес татами мен бес бокс рингіне дейін орналастыруға мүмкіндік береді. Бір сөзбен айтқанда, бұл жерде спортшылар бір уақытта жоғары да айтылған спорттың түрлерінен жаттығулар жүргізе алады. Жаттығу үдерісінен басқа, барлық залдар халықаралық жарыстарды өткізуге қойылатын талаптарға сай. Соған сәйкес, орталық ашылғаннан бері мұнда облыстықтан бастап халықаралық деңгейдегі түрлі жарыстар өткізілуде. Кешеннің аумағы – 14,1 мың шаршы метр.
Жеңіл атлетикалық кешен Атлетикалық жаттығуларға арналған кешеннің ішінде жеңіл атлетика, тритлон, регби секілді ойындардан жаттығуға арналған 200 м айналмалы жолы және секіру мен лақтыру секторлары бар. Сондай-ақ оқу-жаттығу үдерісі мен жарыстарды өткізу үшін қажетті құрал-жабдықтармен толықтай жабдықталған спорт залы салынған. Бұған қоса спортшыларға арналған киім ауыстыратын (ерлер, әйелдер жеке заттары және сыртқы киімдері үшін бөлек), жуынатын бөлмелері қарастырылған. Нысанның ішінде жасанды және табиғи жарықтандыру орналастырылған, толықтай қауіпсіздік қызметімен жабдықталған. Оның жалпы аумағы – 18,5 мың шаршы метр.
Мұз айдыны Жалпы аталған орталық о бастан жаздық олимпиадалық ойындарына даярлауға арналғанымен, мұнда ұлттық құрама мен облыстық командаларға қысы-жазы маңызды жарыстарға толыққанды оқу-жаттығу жиынын өткізуге мүмкіндік жасалған. Осы ретте оның аумағында 4,5 мың шаршы метр алатын мұз айдыны да салынған. Қысы-жазы тоқтамай жұмыс істейтін айдын конькимен сырғанау спортын және шайбалы хоккей, мәнерлеп сырғанау және керлинг бойынша жаттығулар өткізе алады. Сонымен қатар кешенде қыстық спорт түрлерінен әртүрлі дәрежедегі жарыстарды өткізіп отыруға болады. Мұз аренасында барлық қажетті қауіпсіздік шаралары қарастырылған.
Стадион Жеңіл атлетика мен футбол ойнауға арналған стадионның аумағы – 8,6 мың шаршы метр. Ол электронды табломен, электронды хронометраж және жарықтандыру жүйелерімен жабдықталған. Мұнда жеңіл атлетика қажетті 400 м арнайы жол, секіру және лақтыру секторлары бар. Сонымен қатар бұл жерде жаттығулар мен халықаралық деңгейдегі жеңіл атлетика жарыстарын өткізуге болады. Стадиондағы трибунаның сыйымдылығы 6246 көрерменге дейін жетеді.
Қонақ үй 22,6 мың шаршы метр жерді алып жатқан 420 орындық қонай үйде 210 бір бөлмелі және екі бөлмелі 6 люкс нөмір бар. Оған қоса мұнда 420 орындық екі мейрамхана, медициналық пункт, конференц-зал орналасқан. Сондай-ақ спортшылардың кешкі уақыттарын қызықты өткізулері үшін кітапхана, мини-бар, боулинг секілді ойын-сауық орталығы да қарастырылған. Қонақ үй жабдықтары төрт жұлдызды деңгейге сәйкес келеді. Жалпы барлық қолайлылық жасалғандығына қарамастан орталық директорының орынбасары Ермахан Сағиұлының айтуынша, бүгіннің өзінде қонақ үйде орын жетіспеушілігі орын алуда. Осы ретте алдағы уақытта кешен аумағында тағы бір қосалқы қонақ үй салу жоспарда бар.
Ақтоты МЫРЗАБЕКҚЫЗЫ.