Ауданымызда спорттық саланың өсіп-өркендеуі үшін соңғы уақыттарда спорттық кешендердің салынуымен барынша жағдай жасалып келеді. Мәселен, бірқатар нысандар бой түзеп, халыққа пайдалануға беріліп те үлгерді. Солардың қатарында Шамалған ауылдық округінің солтүстік-батысында орналасқан «Úshqońyr» спорт кешенін айтуға болады. Ендеше, осы денешынықтыру-сауықтыру орталығы жайында әңгіме өрбітіп көрсек дейміз.
Аталмыш спорт мектебі ҚР Тұңғыш Президенті – Елбасы Н.Назарбаевтың бастамасымен салынған болса, 2019 жылдың 20 маусымында Нұрсұлтан Әбішұлының қатысуымен салтанатты түрде ашылып, қолданысқа берілген болатын.
Бүгінде Дәурен Төлеген басшылық ететін балалар мен жасөспірімдер спорт мектебінде 1800-ге жуық оқушылардың жаттығуына толық жағдай жасалған. Денешынықтыру-сауықтыру орталығы 5,9 га аумақты алып жатқан аудандағы сәулеті сәнді қалыптасқан нысандардың бірі болып табылады. Жұмысын оқу жылымен қатар бастағалы отырған спорт кешені 115 штаттық қызметкерлермен, оның ішінде 45 білікті жаттықтырушылармен балаларды бейімдеуге дайын десек те болады. Мұнда болашақ чемпиондар 10 олимпиадалық (еркін күрес, дзюдо, бокс, волейбол, жеңіл атлетика, таэквондо, футбол, үлкен теннис, жүзу, бадминтон) және 6 олимпиадалық емес (тай боксы, қол күрес, шахмат, самбо, қазақ күресі, баскетбол) спорт түрімен шұғылдана алады.
Аты айтып тұрғандай, бұл сауықтыру орталығында келушілердің денсаулығын қадағалауға арналған медициналық бөлмелер мен дене қыздыруға арналған сауналарды да ерекше айтуға болады. Ал, 450 адамға лайықты етіп тұрғызылған стадионда төрт жолақты жүгіру жолдары мен стрит-воркаут алаңдары жаттығам деушілерге арнайы жасалынған. Біздің жоғарыда айрықша атап көрсеткеніміздей, бірқатар спорт түрлеріне қатысты залдар мен арнайы бөлмелердің барлығы заманауи, соңғы стандарт үлгіде жабдықталған. Сондай-ақ, көптеген спорттық жарыстар мен іс-шаралардың алдын ала ұйымдастырылуына, талқылануына байланысты конференция залдары спорт кешенінің бір ерекшелігі болып табылады.
Келешекте «Úshqońyr» спорт кешені ауданға қарасты қала, ауылдық округтердегі жасөспірімдерді түрлі спорт түріне баулып, елдің даңқын шығаратын болашақ чемпиондарды тәрбиелеп шығарады деп сенеміз!
Дидар МУХАМАДИЕВ.